ВЕРБАС – Општина Вербас и Културни центер Вербасу орґанизовали всоботу, 22. марца 55. Општинску смотру рецитаторох „Поето народу мойого” котра отримана у сали Биоскопа „Югославия” у Вербаше.
На смотри участвовали вецей як 70 рецитаторе зоз цалей вербаскей општини, котри ше представели у трох старосних катеґорийох.
Присутних привитали предсидатель општини Вербас Милан Ґлушац и директор Културного центру Вербасу Боян Периз, а тогорочна смотра почала з минуту цихосци на чесц настрадалому у нєщесцу на Желєзнїцкей станїци у Новим Садзе Вукашинови Црнчевичови.
Основну школу „Братство єдинство” зоз Коцура представяли три школярки – школярка другей класи Ана Тимко чия менторка Славица Чельовски, школярка трецей класи Ема Ґубаш менторка єй Єлена Русковски и школярка штвартей класи Лара Ґубаш а менторка Мария Полдруги.
Дзекуюци своїм успишним наступом, школярки Ема и Лара ше пласовали на Зонску смотру котра будзе отримана 29. марца у Бачу.
