КОЦУР – На треци дзень Велькей ноци, на Шветли вовторок, у Грекокатолїцкей церкви Успения Пресвятей Богородици у Коцуре на 10 годзин служена Архиєрейска Слуба Божа котру предводзел владика кир Георгий Джуджар.
Зоз владиком Джуджаром, котри бул и казательник, сослужели парох шидски о. Михайло Режак, парох нововербаски о. Данил Задрепко, парох кулски єромонах Дамян Кича, ЧССВ, парох коцурски о. Владислав Рац и новопошвецени диякон Иван Дацешен.
Як визначел владика Джуджар, диякон Дацешен зоз Вербасу, а за диякона є пошвецени дзень пред тим, на Шветли пондзелок у Конкатедралней церкви св. апостолох Петра и Павла у Новим Садзе. До пошвецаня за священїка, котре ма буц у Вербаше на швето святого Владимира 27. юлия, диякон Дацешен будзе окончовац дияконску службу.
Числени вирни присуствовали на Архиєрейскей Служби Божей, а цале богослуженє зоз шпивом прикрашел Хор Грекокатолїцкей церкви Успения Пресвятей Богородици.
