КОЦУР – У Дзецинским тижню, хтори закончени прешлого пиятку, за коцурских школярох були пририхтани числени активносци – од спортских и едукативних змаганьох, по креативни роботнї, а шицки и з тему тогорочней манифестациї „Потримовка фамелиї – найлєпша потримовка дзецом”.
Наймладши школяре ОШ и дзеци з дзецинскей заградки „Герлїчка” рисовали по асфалту, нащивели Ґеронтолоґийни центер, а на концу Дзецинского тижня мали маскенбал, та ше у маскох прешпацирали по центре валалу.
Цали тидзень були спортски змаганя у одбойки и малим фодбалє, орґанизовани крос за старших, а за младших школярох штафетни бависка. Школяре од першей по штварту класу мали роботнї „Бав ше и направ дацо красне з ЕКО-материялу” и „Бабка”, на хторей им и у правеню бабкох з рендочкох помагали и родичи.
Понеже октобер и Мешац кнїжки, школяре нащивйовали и валалску библиотеку, дзе ше у Дзецинским тижню могли безплатно уписац. Вибрани школяре з Коцура були и на приєму при предсидательови Општини, а найлєпши фодбалере на Медзиопштинским змаганю у малим фодбалє.
У рамикох Дзецинского тижня и ОШ и дзецинска заградка участвовали у гуманитарней акциї „Дзеци дзецом”, на хторей зберани школски прибор, стари учебнїки, облєчиво и бависка дзецом у потреби, а Дзецински тидзень у Коцуре закончени зоз журку за младших, а познєйше и за старших школярох.
