3. СЕПТЕМБЕР – На нєшкайши дзень ше народзела учителька Наталия Пейович.
1869 – Народзел ше археолоґ Милоє Васич (Пожежено, 3. септембер 1869 – Беоґрад, 4. новембер 1956), бул универзитетски професор и академик, професор на Беоґрадским универзитету и член САНУ. На основи викопованьох предисторийного локалитета у Винчи заключел же подунайска култура походзи зоз Стредожемя и преднєй Азиї, а нє зоз нордийских жемох.
1930 – Народзела ше учителька и режисерка Наталия Пейович, дзивоцке Абодї (Горнї Раїчи, Горваска, 3. септембер 1930 – Нови Сад, 2011). До першей класи почала ходзиц у Шидзе, а вец ше фамелия преселєла до Бачинцох, потим у Сримскей Митровици закончела ґимназию, и Учительску школу у Сримских Карловцох. Перше роботне место єй було у Сримскей Митровици, була учителька у руским оддзелєню. Наталия Абодї, 1952. року, закончела семинар за режию и шминку у Руским Керестуре при режисерови Петрови Ризничови Дядьови. Пошвидко зоз школярами драмскей секци у Сримскей Митровици порихтала представу Два малженски пари. Зоз фамелию ше преселєла до Нового Саду и по пензию 1987. року учителька Наталия, лєбо як ю школяре волали Наташа Пейович робела у Основней школи Коста Трифкович.
1939 – На кружней дражки коло Калемеґдану у Беоґрадзе отримани по теди найвекши медзинародни автомобилски обегованя у Югославиї.