КОЦУР – У просторийох Подручней канцелариї Националного совиту Руснацох у Коцуре всоботу, 25. октобра, на 11 годзин, Здруженє гражданох СОФИА зоз Нового Саду, отримaло першу роботню под назву Вибиванє и вишиванє.
Роботню водзела Наташа Макаї Мудрох котра прешла едукацию за тоти стари схопносци, а на роботнї присуствовали жени и дзивки рижних ґенерацийох, котри ше учели, або здогадли, як ше вибивало на платну и вишивало зоз технїку полнєня.
Тот проєкт Здруженя СОФИА потримує и финансує Завод за културу войводянских Руснацох прейґ конкурсу хтори розписал за софинансованє програмох и проєктох очуваня, пестованя, презентациї и розвою култури и уметносци рускей заєднїци у Републики Сербиї.
По словох єдного зоз сновательох Здруженя СОФИА, Елемира Джуджара, плановане же би ище даскельо роботнї були отримани у новембру и децембру, а кед же останє средства и будзе заинтересованих, годни буц отримани и у даєдним другим руским штредку.
