КОЦУР – У коцурским Оддзелєню „Герлїчка” Предшколскей установи „Бошко Буха” з Вербасу вчера отримана пригодна програма з нагоди подписованя контрактох о додзельованю стимулацийох першокласнїком и дзецом котри предшколску наставу слухаю по руски.
На програми участвовали школяре руских оддзелєньох од 1. по 4. класу и тройо оводарци котри ходза до руского предшколского оддзелєня. Школяре през писню, рецитациї и драмски точки привитали присутних родичох и представительох институцийох.
На програми були и подпредсидатель Националного совиту (НС) Руснацох Микола Шанта, предсидатель Вивершного одбору НС Руснацох Желько Ковач, помоцнїца предсидателя Општини Вербас Ксения Бенце, Директорка ПУ „Бошко Буха” Милияна Ґруїч, члени Подручней канцелариї НС у Коцуре, директорка ОШ Славица Байор и други.
По законченю програми и привитних словох, тринацецеро родичи подписали контракти о додзельованю мешачней стимулаци од 5 000 динари за основношколцох и 3 000 динари за предшколцох.
Дзецом подзелєни и кнїжки на руским язику, та предшколски достали учебнїк „Уж видзим школу”, а першоклашнїки учебнїк за виронауку, школярску гимну и бедж.
