НОВИ САД – Вишла децемберска „Заградка”, а вєдно з ню и дарунок – дружтвене бависко у новорочним духу.
Рубрика Пречитали и роздумали понука простор за писанє винчованки, лєбо писма Дїдови Мразови, Госци и новосци дава прегляд дзецинских збуваньох остатнїх тижньох, док у рубрики Сцеме знац и упознац зазначени друженя дзецох и писательох на Културней манифестациї „Костельникова єшень”.
У Читальнї мож пречитац другу и закончуюцу часц текста представи „Шарканї и делфини” автора Сашу Палєнкаша зоз його новей кнїжки з исту назву. Мала заградка понука наймладшим крачунски винчованки, як и креативни задатки.
Вецей боки и у тим „Заградковим” остатнїм чишлє у тим року пошвецени школярским и оводарским литературним и подобовим роботом. У „Заградковей” рубрики Док вирошнєм будзем… новинарка Сенка Русковски Надь дзецом представела свою професию.
На Забавних бокох мож ришиц вецей интересантни задатки, у рубрики Радио у Заградки научиц як направиц паперово лабдочки/шерца з нашеньом, док у рубрики Мой любимец шестри Рашич з Вербасу представели читачом свойого заяца.