КОЦУР – У Грекокатолїцкей церкви Успения Пресвятей Богородици, штварток вечар, 18. децембра, отримане Всеночне з нагоди означованя швета святого оца Миколая.
Всеночному присуствовали числени парохиянє, здогаднуюци ше велькосци и доброти святого Миколая. По законченю Всеночного, отримана и святочна програма на чесц святому Миколайови. Наймладши парохиянє коцурскей парохиї порихтали числени шпиванки, стихи и драмски слички з котрима славели його живот, доброту и шицки добри дїла.
Святи Миколай побешедовал зоз дзецми, а вєдно ше здогадли як треба же би ше справовали и були добри християнє. Програму зоз виронаучнима дзецми пририхтала вироучителька Ксения Бесерминї, а на гушлї их провадзел учитель Марко Буила.
Церква того вечара була полна, а наймладших провадзели їх найблїзши и члени фамелиї. По законченю програми, святи Миколай обрадовал шицки дзеци и подзелєл им пакецики.
Ютредзень, 19. децембра, на швето святого оца Миколая у шицких Службох Божих було и мированє парохиянох.
