РУСКИ КЕРЕСТУР – У рамикох фахового усовершованя занятих у образованю, вчера 23. януара у Основней и штреднєй школи зоз Домом школярох „Петро Кузмякˮ у Руским Керестуре, отримани акредитовани семинар под назву „Як унапредзиц процес самоевалуациї у обласци настави и ученяˮ.
На семинаре участвовали наставнїки и фахово сотруднїки зоз цильом же би унапредзели квалитет наставного процесу и змоцнєли компетенциї, а семинар отримали педаґоґ Земунскей ґимназиї и предсидатель Педаґоґийного дружтва Сербиї Иван Давидович и дипломовани педаґоґ и педаґоґийни совитнїк Ґордана Милованович.
У роботи, учашнїки семинару ше упознали зоз сучаснима моделами и алатами за самоевалуацию, як и зоз способами провадзеня и унапредзованя квалитету настави и ученя.
Семинар реализовани през интерактивни активносци и черанку искуствох, а оценєни є як важне доприношенє за унапредзованє роботи наставнїкох и за розвой школи.
