БЕЧЕЙ/ПАНЧЕВО – Даниел Фейди, школяр 4. класи тамбури басприм керестурского видзелєного оддзелєня Школи за основне музичне образованє (ШОМО) Кула, освоєл 1. и 2. награду на нєдавно отриманих змаганьох у Бечею и Панчеве.
Даниел завжал 1. награду у своєй катеґориї на 21. Фестивалу войводянскей тамбури, отриманим 11. марца у Бечею. Зоз освоєнима 98 бодами, од можлївих 100, Даниел бул найлєпши у своєй катеґориї, та наступел и на вечаршим Концерту найуспишнєйших школярох спрам катеґорийох.
Нєодлуга потим, 17. марца на Републичним змаганю Здруженя музичних и балетских педаґоґох Сербиї, отриманим у Панчеве, Даниел освоєл и 2. награду зоз 93 бодами.
Даниел Фейди школяр у класи наставнїци Геленки Гарвильчак, а корепетиторка на обидвох змаганьох була Кая Мандич Плавшич.
