ДЮРДЬОВ – У Основней школи „Йован Йованович Змай” у Дюрдьове, пондзелок 30. марца отримане Медзиокружне музичне змаганє „Триолица”, у котрим ше змагали вокални солисти, мали музични состави, хори и оркестри зоз дзешец местох Южней Бачки.
На змаганю участвовали школяре основних школох котри ше змагали у седем катеґорийох. Було трицец дзевец наступи, а на Републичну смотру ше пласовали тринац учашнїки. Медзи нїма и Ивана Сакач школярка штвартей класи ОШ „Петар Петрович Нєґош” зоз Вербасу котра шпивала дзецинску шпиванку по анґийски.
Зоз дюрдьовскей ОШ „Йован Йованович Змай” було шесцеро змагателє и шицки наступели як вокални солисти, а на републичне змаганє ше пласовала Яна Мартинович школярка штвартей класи котра шпивала сербску народу шпиванку.
На змаганю Дюрдьовчанє завжали перше место, алє нє и пласман за далєй: Ана Канюх, Михайло Пап и Олґа Симетич. Друге место завжали Владимир Тимко котри єдини шпивал на руским язику и Дарко Шарич.
Републична смотра музичного змаганя „Триолица” будзе у Беоґрадзе 25. и 26. априла.
