13. МАЙ – На нєшкайши дзень народзена царица Мария Терезия и учителька Мелания Планчак.
1717 – Народзена австрийска царица, ческа и мадярска кралїца Мария Терезия (Беч, 13. май 1717 – Беч, 29, новембер 1780), була єдина жена владар габзбурґских маєткох и остатнї член династиї Габзбурґ. Владала як найвойводкиня Австриї, кралїца Угорскей, Ческей, Горватскей, Славониї, Галициї и Лодомериї, як войводкиня Мантови, Милана, Парми, Пяченци и Ґвастали и як владарка Австрийскей Голандиї и велїх ґрофовийох. Зоз малженством була царица Святого римского царства нємецкого народу, нємецка кралїца, велька войводкиня Тоскани.
1795 – Народзени словацки филолоґ и историчар Павел Йозеф Шафарик (Кобелярово, Словацка, 13. май 1795 – Прага, Ческа, 26. юний 1861), бул єден з сновательох славистики.
1851 – Народзени лїкар и писатель Лаза Лазаревич (Шабац, 13. май 1851 – Беоґрад, 10. януар 1891), бул психиятер и неуролоґ, писал приповедки сербского реализма.
1929 – Народзела ше учителька и панїматка Мелания Планчак, дзивоцке Канюх (Руски Керестур, 13. май 1929 – 22. новембер 2017). Учительску школу закончела у Сримских Карловцох и Суботици. Робела у Руским Керестуре, Новим Орахове, Коцуре, а найдлужей робела у Петровцох, у Горватскей, дзе ше цала фамелия преселєла 1969. року. Була учителька класней настави, руского, а познєйше и українского язика. Учителька пририхтовала и школски програми з нагоди державних шветох, вєдно зоз КПД „Яким Гарди”. У школи пририхтовала рочни школски часопис „Венчик”. У Петровцох була и директорка подручней школи, хтора припадала под вуковарску ОШ Други конґрес КПЮ, одкаль одходзи до пензиї 1985. року. Зоз супругом o. Кирилом Планчаком одходза до Нємецкей, до Нирнберґу, а врацаю ше до Руского Керестура 1998. року, ґу своїм дзецом и унуком. Учителька Мелания Планчак похована на керестурским теметове.
1946 – Почало насельованє до Нового Орахова. Предвечаром того дня, 360 фамелиї преважно зоз Руского Керестура сцигли на простор дзе були вецей салаши и даскельо хижи и започали нови живот и вибудов. У Новим Орахове ше зоз манифестацию 13. май кажди рок, означує приход Руснацох до того места.
1946 – Почало насельованє до Нового Орахова. Предвечаром того дня 360 фамелиї преважно зоз Руского Керестура, сцигли на простор дзе були вецей салаши даскельо хижи и започаки нови живот и вибудов. У Новим Орахове ше зоз манифестацию 13. май кажди рок, означує приход Руснацох до того места.
1999 – Авиони НАТО звалєли рухоми мост у Вербаше на Вельким бачким каналу. Источашнє зоз ґрафитнима бомбами знова потрафени пошореня Електропривреди Сербиї, прецо без струї остали велї места, медзи хторима и часци Нового Саду.
2006 – У Новим Садзе вєдно з отвераньом 73. медзинародного польопривредного сайма отворени и Мастер центер. То саямско-конґресни и дїловно-тарґовецки центер на Новосадским сайме. У рамикох Мастер центру находзи ше и Конґресни центер, дзе єст шейсц сали и амфитеатер.