РУСКИ КЕРЕСТУР – Пията Манифестация традицийних руских єдлох „Смаки традициї” того року будзе отримана на соботу, 6. юния. Манифестация, як и потераз, будзе отримана на желєней поверхносци коло Спортскей гали у Руским Керестуре, у чаше од 11 по 20 годзин, а у орґанизациї Здруженя гражданох „Руска скарбнїца”.
През тот час, як и прешлих рокох, нащивителє годни покоштовац богати вибор традицийних руских єдлох, а попри деґустациї, орґанизаторе наявюю и богату културно-уметнїцку програму, интересантни спортски бависка и рижни роботнї за дзеци.
Акцент на тогорочней манифестациї, визначую орґанизаторе, будзе на участвованю наймладших у рижних активносцох, у часци културно-уметнїцкей програми, старих руских бавискох и креативних роботньох.
Кед слово о културно-уметнїцкей часци, присутним ше представя дзеци зоз Музичней оводи, дзецински хор „Шкорванчки” як и бенд Дома култури Руски Керестур „Women power”.
Манифестацию орґанизує Здруженє гражданох „Руска скарбнїца” зоз потримовку спонзорох.