15. ЮЛИЙ – На нєшайши дзень народзени Юлиян Колєсар и Звонимир Павлович.
1606 – Народзел ше маляр Харменс Ван Райн Рембрант (Лайден, Голандия, 15. юлий 1606 – Амстердам, 4. октобер 1669) голандски барокни маляр и ґрафичар.
1795 – Марселєза урядово прилапена за гимну Французкей. Автор текста Клод Жозеф Руже де Лил, а написал ю през ноц 25. и 26. априла 1792 року и теди у наволал Воєна шпиванка войска на Райни (Chant de guerre pour l’armée du Rhin).
1834 – Розпущена шпанска инквизиция, после скоро 356 рокох терору.
1927 – Народзел ше Юлиян Колєсар (Дюрдьов, 15. юлий 1927 – Монтреал, Канада, 26. марец 1992), писатель, маляр, и етноґраф. Юлиян Колєсар до основней школи ходзел у Дюрдьове, закончел Стредню школу за применєну уметносц и Висшу педаґоґийну школу у Новим Садзе. Од 1958. року жил у Бриселу (Белґия), Заґребе, Пули, Паризу, а вец пошол до Филаделфиї (ЗАД). У Нюйорку робел як комерциялни уметнїк, а од 1973. року жил и робел у Монтреалу у Канади. Попри малярства Колєсар виглєдовал и виучовал и даєдни обласци з нашей етноґрафиї – облєчиво, орнаментику, мальовани образи на склу, керамику, тканїни, вишивки, обичаї и особни мена и презвиска у валалох дзе жию Руснаци. Кнїжку История руского народного мена постгумно видала НВУ Руске слово, 1996. року. Юлиян Колєсар умар 26. марца 1992. року у Монтреалу у Канади дзе є и поховани.
1941 – Похасноване перше ракетне оружиє такволани „катюши”. Тото плотунске ракетне оружиє похасновала Червена армия при месце Рудня при Смоленску у Другей шветовей войни.
1955 – Народзел ше ґлумец, режисер и драматурґ Звонимир Павлович (Руски Керестур, 15. юлий 1955 – Нови Сад, 14. януар 2022). Основну школу и ґимназию закончел у Новим Садзе, дзе и абсолвовал историю на Филозофским факултету. Павлович режирал коло двацец театрални представи и перформанси, на руским и сербским язику, познати є и як телевизийни ґлумец. Участвовал у вецей бавених телевизийних програмох, як автор телевизийних сценарийох и як режисер радио драмох. Бул єден з найпознатших руских режисерох-аматерох, котри провадзел сучасни театрални тренди у нас и у швеце, и любел експериментовац на сцени. Ношитель є значних покраїнских припознаньох и наградох за ґлуму и режию у Панчеве и Мостаре. У рамикох порядней дїялносци РКПД з Нового Саду, Звонимир Павлович порушал даскельо замерковани програми и панел-трибини з обласци актуалнох збуваньох у рускей култури, як цо то Стретнуца и Под смужку. Автор є Фестивала дзецинскей творчосци Руснацох Войводини Веселинка у сотруднїцтве зоз Руским културним центром у Новим Садзе. Звонимир Павлович поховани 18. януара на новосадским городским теметове.
1957 – Народзел ше дружтвени дїяч, учитель и писатель Василь Мулеса (Заричево, Перечински район, 15. юлий 1957 – Перечин, Україна, 15. марец 2023). Високе образованє филолоґа здобул на Ужгородским универзитету. Робел як учитель, а потим як новинар, орґанизатор локалного радия. Робел и у локалних новинох Карпатски край. Бул член Националного здруженя новинарох и член Националного здруженя писательох України. Написал и вецей кнїжки. Пейц роки бул на чолє Закарпатскей орґанизациї Лемкивщина. Року 2017. бул вибрани за секретара Шветовей федерациї українских лемковских орґанизацийох (СФУЛО). Бул орґанизатор Лемковскей ватри на Закарпатю. Вецейраз нащивел войводянски места Руски Керестур, Дюрдьов, Нови Сад.
2006 – Дружтвена мрежа Твитер почала з роботу.
2012 – Южнокорейски музичар Псай (Psy) обявел спот Ґанґнам стайл на Ютюбу, хтори постал перши видео-знїмок на платформи зоз вецей як милиярду препатрунки.
Шветови дзень схопносцох младих (World Youth Skills Day). Преглашели го Зєдинєни нациї 2014. року же би ше указало на квалитетне образованє и обучованє хторе младим оможлївює здобуванє схопносцох яки потребни за успих у сучасним дружтве дзе технолоґиї швидко напредую, а з тим ше и тарґовище роботи нєпреривно меня.