СЕРБИЯ – Од 27. юния у Сербиї на моци нови правила хтори меняю статус велького числа електричних бициґлох. Спрам актуалних предписаньох, одредзени модели ше вецей нє трима як бициґли, алє як мопеди, цо за власнїкох значи и велї нови законски обовязки.
Електрична бициґла и далєй затримує статус бициґли кед мотор служи виключно як помоц при обрацаню педалох, його моц нє векша як 250 вати, а помоц мотора автоматски престава кед превозка посцигнє швидкосц 25 километри на годзину.
З другого боку, електрична бициґла ше по новим закону трима же є мопед кед ше може рушац без обрацаня педалох, односно кед ма ручку або ґомбичку за ґас, кед мотор моцнєйши як 250 вати або кед може исц швидше як 25 километри на годзину.
За превозки хтори ше тераз учишлюю до катеґориї мопедох обовязна реґистрация и реґистерски таблїчки, технїчни препатрунок, полиса обовязного осиґураня як и вожацка дозвола найменєй АМ катеґориї. Гражданє хтори маю вожацку дозволу Б катеґориї можу вожиц и мопеди. Тиж так обовязне и ношиц защитну кациґу.
Предвидзени и високи пенєжни кари за потупенє нових предписаньох. За воженє нє реґистрованого мопеду кара виноши од 20 по 40 тисячи динари, зоз можлївосцу знїманя реґистерских таблїчкох и забрану воженя у тирваню найменєй три мешаци. Кара за воженє без защитней кациґи або зоз нє закапчану кациґу виноши 10 тисячи динари.
Окреме строги кари одноша ше на малолїтнїкох. Кед зоз мопедом управя дзецко од 14 по 18 роки без сполнєтих законских условийох, одвичательносц зноши родитель або старатель, хторому грожи кара од 100 по 120 тисячи динари. Кед родитель свидомо оможлївел дзецку же би управяло зоз мопедом без одвитуюцей вожацкей дозволи, може буц покарани зоз додатну кару у суми од 100 по 120 тисячи динари. У случаю вецей потупеньох источашнє, кари ше здава, та вкупна сума може буц и векша як 200 тисячи динари.
Фаховци спозорюю же ше нови правила одноша на вельке число електричних бициґлох хтори потераз хасновани як обични превозки, окреме у менших штредкох. Власнїком ше совитує же би преверели технїчни характеристики своїх превозкох и най, кед же сполнюю условия за катеґорию мопеда, оконча реґистрацию, технїчни препатрунок, заключа обовязне осиґуранє и хасную предписану защитну опрему же би керовали високи пенєжни кари.