За школяра ґенерациї Основней школи „Петро Кузмяк” у Руским Керестуре у тим школским року преглашени Никола Петкович хтори, як визначене, зоз свою роботу, знаньом, одвичательносцу и одношеньом ґу другим зохабел окремни шлїд у керестурскей Школи.
Як ище обгрунтовали зоз Школи, титула школяра ґенерациї нє лєм припознанє за одлични оцени. Вона злученє вредней роботи, витирвалосци, пошвеценосци и порихтаносци посцигнуц максимум. Никола указал же ше успих нє посцигує случайно, алє зоз каждодньовим намаганьом, дисциплину и виру до власних можлївосцох.
– Задоволююце чувство кед ше достанє таку награду, бо сом уложел вельо труду до того успиху и наисце сом ше чувствовал крашнє и виполнєто кед сом чул же будзем школяр ґенерациї. Кед ше огляднєм на осемрочне школованє, найбаржей будзем паметац товаришох хторих сом здобул у школи, нє знам чи бим без нїх и посцигнул таки успих, а тиж так и без наставнїкох котри ме потримовали на каждим крочаю. Вшелїяк же треба уложиц труд до ученя, алє думам же то найменша часц. Кед маме добри одношеня з людзми коло нас, будземе мац лєпши успихи и у других аспектох – визначує Никола, хторому оддзелєнски старшина була Каролина Джуджар, а учителька Нада Колошняї.
Никола достал Вукову диплому, як и диплому „Доситей Обрадович” зоз руского язика, анґлийского язика, сербского язика, историї, хемиї, биолоґиї, а похвалєни є зоз нємецкого язика, математики, музичней култури и зоз физики.
– Єден з облюбенших предметох ми физика, котру барз любим и любел сом ходзиц и на змаганя. Тиж так сом полюбел и хемию у седмей класи, а пред тим як превагла физика, барз сом любел и историю. Наймилше змаганє на котрим сом наградзени ми Окружне змаганє з анґлийского язика, Општинске з физики и Окружне з хемиї. Остали ми у паметаню прето же сом ше там упознал зоз новима товаришами и посцигнул значни успихи – гвари Никола и здогадує ше як му було прешлого року у Виглєдовацкей станїци Петница.
– Там сом ше упознал з даєднима предметами хтори ше ми попачели, даєдни сом ище баржей полюбел, алє сом и похопел хтори науки ми нє одвитую. То було наисце окремне дожице и думам же нїґда нє забудзем тот тидзень у Петници – бешедує нам Никола и одгадує же штреднє образованє предлужує у Новим Садзе, у Електротехнїчней школи, на напряму – електротехнїчар рахункарох.
У обгрунтованю титули школяра ґенерациї, Школа „Петро Кузмяк” окреме наглашела и тото же ше Никола през школованє визначел нє лєм у школских активносцох, алє и на змаганьох, школских проєктох и у дружтвеним живоце школи. Зоз своїм прикладом мотивовал парнякох же би були лєпши, а зоз своїм справованьом здобул почитованє наставнїкох и приятельох. Ми ше у розгварки з нїм прешвечели же то наисце так и же Никола єден мудри млади чловек, добри у души, дозрети за свойо роки, вредни и талантовани и вериме же пред нїм єдна красна будучносц.
Наука у глави, тамбура и лабда у рукох
Никола закончел и Основну музичну школу, дзе грал на тамбури, а тиж так тренира и кошарку у нєдавно основаним Кошаркашским клубе „Русин”. Гвари же гоч су початнїки, добра су екипа и добре им идзе, алє понеже од єшенї пойдзе до Нового Саду, наздава ше же там предлужи тренирац тот спорт.
Духовносц як велька подпора у живоце
Одмалючка ходзи до церкви, дзе дакеди чита и Апостол, а Никола тиж так активни и у керестурским Каритасу.
– Духовносц часц мнє, хтора елементарна, и наздавам ше же нїґда нє забудзем яка ми була подпора у живоце. Каритас цошка цо ишло вєдно з тим и кед сом ше придружел ґу волонтером, трудзел сом ше буц активни. Тераз сом нє мал тельо часу пре рижни обовязки, алє верим же ше там ознова активуєм – гвари вон.
