НОВЕ ОРАХОВО – Ораховске добродзечне огньогасне дружтво того року мало вецей интервенциї, а останя була 23. юлия. Пред поладньом достали дояву же ше запалєла сцернянка на полю котре блїзко при основней школи.
Огньогасци такой вишли на польо, та огень швидко бул загашени. Утвердзене же огень виволали врани хтори лєцели коло трансформаторох на бандерох и на якиш чудни способ заквачели дроти, та ше зявели искри, птица ше запалєла та спадла на сцернянку, та ше огень розбовчал.
Лєм цо ше камиони врацели до ґаражи и наполнєли цистерни зоз воду пришла нова поволанка же у хотаре гори сцернянка на хторей була побалирана слама. Там огень бул вельо озбильнєйши, польо на коло 25 гектарох було з векшей часци залапене з пламеньом.
Того дня дул моцни витор, та ше огень швидко ширел. Огньогасци гашели зоз двома цистернами, а помогли и двоме парасти хтори нєдалєко угорели, та одорали польо най ше огень нє шири. Як тото польо почало гориц нє утвердзене.
У ораховским хотаре жатва закончена ище пред 10-12 днями, алє слама ище вше нє вивежена зоз даєдних польох, а єст ище и досц нєзугореней сцернянки, прето треба буц осторожни же би дацо нє почало гориц.