Слово грих етимолоґийно походзи од праславянского кореня и директно ше повязує зоз словами гришка и погришиц. Корень слова означує премашованє циля, або скруцованє зоз правей драги.

Синтаґму грих у моди мож розумиц як поняце же грих популарни. Особа хтора спричинї транспортне нєщесце, хтора ше побиє на варошу, провокативно облєче, у нєшкайшим online швеце часто популарна. Тото цо нашим бабом страшне и нєнормалне, нєшка ма найвецей лайки. Патренє з того угла на тоту синтаґму то часц воспитаня з обисца и даремно ту писац о тим…

Алє грих у моди о хторим бешедуєме кед сцеме обрациц увагу на тото же у нашим одношеню ґу модней индустриї часто гришиме (нароком, або случайно, пре нєинформованосц), то тема о хторей треба частейше приповедац!

Пре вельки заробки поєдинцох, маса людзох роби и жиє скромно, понїжуюцо, на рамикох еґзистенциї, а ми ше стретаме зоз новима поняцами як цо то:

• fast fashion – швидка мода;
• outsourcing – анґажованє вонкашнїх сотруднїкох;
• sweatshop система – одноши ше на роботне окруженє, або модел роботи у фабрикох у хторим роботнїки робя прейґмирно, за винїмково нїзки плаци, у нєбезпечних и нєгиґиєнских условийох;
• CSR – corporate social responsibility – корпоративна дружтвена одвичательносц;
• child labor – робота дзецох;
• ultra–fast fashion – ултра швидка мода;
• ultra–cheap модел – ултра тунї модел;
• sustainable fashion brands – отримуюци модни бренди.

Fast fashion (швидка мода) то модел роботи по хторим ше найновши модели облєчива и обуї представени на модней писти швидко копира, масовно шиє з малима трошками и предава у предавальньох на мало. Тоти облєчива доступни шицким (и з финансийного боку и физично). То значи же, наприклад, кед даєдна манекенка ношела сукню на модней писти у Милану, можеш буц на мире, прето же о кратки час и ти годна купиц подобну сукню за тунї пенєж на пияцу у своїм валалє. Ту наиходзиме на нєправилносц! Ти нє треба же биш була на мире. Fast fashion нє треба най постої.

Шицки ше любиме поприберац.

Алє приберанє до шматох хтори часц индустриї швидкей моди, нє ришенє. Кед сом почала ходзиц на варош, кажда пайташка мала даяку шмату, обуй, або торбичку хтору зме шицки ношели. Ми то робели прето же зме нє мали досц пенєжи же би кажда себе купела шицко. Нєшка сом свидома же ми чували нашу планету, и других людзох.

Тунї найновши модни тренди ше купує, алє людзе нє свидоми длугорочних пошлїдкох хтори тото купованє приноши. Фабрики хтори продукую шмати троша вельо води (нам то нє завадза прето же, за тераз, маме досц води, алє дзеци у Афрки умераю бо нє маю воду за пице). Тота индустрия продукує вельо пластики – полиестер, хтори заґадзує воздух и моря.

Памук хтори ше продуковало, нє бул випродуковани тельо кельо потребне швидкей индустриї. Прето ше продукує вельо вецей памуку. Алє нєт досц часу же би ше гварело же: Того року урожай подлєйши и же ше будзе шиц менєй шмати. Приходзи до того же продукователє хасную вельке количество пестицидох и так можу прейґмирно продуковац памук.

Цена шматох нїзша, а людзе их вше вецей купую. Велї ше ганьбя облєчиц два раз исту сукню на свадзбу. А и Чом би ше ношело исти шмати, кед єст таки прекрасни нови сукнї? Пре таке роздумованє и становиско, людзе одруцаю шмати. Шмати ше нє дарує, нє ноши ше подароване. Єдни ше одруца, а други купує. Кажду секунду ше на швеце руци, або спалї тельо шмати кельо станє до єдного камиона.

Швидка мода ма вецей неґативни боки, як позитивни.

Поступки з хторима ше заґадзує нашу планету сом описала, алє важне наглашиц и у яких условийох робя заняти у индустриї швидкей моди.

Поняце sweatshop описує фабрику, або роботню у хторей ше заняти вирабюю, робя прейґмирно за винїмково нїзки плаци и у нєбезпечних и нєгиґиєнских условийох. Закон о защити занятих постої.

Бешедує ше и о corporate social responsibility – CSR – дружтвено одвичательним дїлованю, хторе подрозумює транспарентну и етичну систему водзеня и надпатраня компаниї. У контрактох компанийох шицки условия виполнєни, алє ми и далєй кеди-нєкеди читаме висти же настрадали людзе на своїх роботних местох, пре нєгумани условия у хторих робели.

Найстрашнєйши термини и теми тоти хтори описую заняти дзеци. Child labor (дзецинска робота) означує роботу хтора чкодлїва за ментални, физични, социялни, лєбо морални розвой дзецка. Медзинародна орґанизация роботи (International Labour Organization – ILO) таку роботу дефинує як експлоатацию з хтору ше дзецом однїма дзецинство и достоїнство, а у найчежшей форми подрозумює рабство, роботи на силу и тарґовину дзецох.

Вельки компаниї нє одвитую за роботни (нє)условия у хторих робя людзе пре вецей причини.

Єдна з нїх то outsorcing, односно пракса у хторей компания анґажує аґенцию, або другу фирму хтора за тоту вельку компанию пороби одредзену роботу.

Приклад у пракси таки: Велька компания може анґажовац малу фирму у хторей ше ушиє лєм нукашньосц ципели (дзе условия роботи нєадекватни) и вец тот полупродукт докончи тота велька компания, чийо роботнїки плацени тельо кельо треба и робя у задоволююцих условийох. На тей ципели будзе писац же ю направела тота велька компания, а особа хтора себе купи тоту ципелу ю будзе плациц туньше.

На таки способ исти тоти вельки компаниї туньше достаню тото цо сцу, а одвичательносц о условийох роботи муши превжац аґенция, або друга фирма, док ше вони отримую.

Места на хторих купуєце продукти швидкей моди то H&M, Shein, Zara…

Велї подумаю же ми мали же бизме направели вельки пременки. Алє кед велї з нас малих направя вельо мали пременки, на  концу то будзе велька пременка!

Вше кед можеме, треба же бизме вибрали отримуюцу, а нє швидку моду.

Отримуюца мода хаснує материяли хтори єй на розполаганю (нє продукує ресурси же би витворела норми), хаснує природни и рецикловани материяли, а заняти на продукованю такей моди робя на транспарентних роботних местох.

Можеме куповац:

• менєй,
• мудрейше (куповац тото цо ше нам наисце пачи и цо нам наисце потребне) и
• квалитетнєйше.

Можебуц випатра драгше, алє кед патриме длугорочно, наисце є туньша! Кед же шицко тото цо написане у тексту нєдосц же би дахто вибрал куповац од брендох хтори отрумуюци, напишем ище и тото: виберце на свойо цело облєчиц памук, лєн, а нє пластику. Цело вам будзе подзековне.

Кед споминаме грих як тему, могла бим спомнуц и TEMU. Там ше купує и потребни и нєпотребни ствари. Гриши ше спрам природи. Спрам природи хтору треба чисту охабиц своїм дзецом, унучатом, праунучатом, а часто то забуваме. Кед природа нє будзе такa яку ю познаме – нє будзе анї нас.

Апеловала бим на кажду особу хтора сце купиц дацо най роздума же тоту ствар (сукню, привязок, подли патики, окуляри за слунко, сандали, шрафциґер…) направела худобна особа, хтора на своїм роботним месце роби и 16–18 годзини дньово. Свойо дзеци нє сцигує стретнуц, а нє воспитац. Можебуц роби зоз своїма, або цудзима дзецми.

Же би тунї ствари були тунї, муша буц направени зоз барз тунїх продуктох (читай: найвироятнєйше зоз барз нєздравих продуктох). Кед це нє бриґа за других, чувай голєм себе.

Поносуєме ше на систему, а пантлїку за главу нє купиме од сушеди хтора ю штрикала даскельо годзини, хтора квалитетна и будзе длуго тирвац, алє тоту хтора три раз туньша и хтору о три тижнї одруциме (нє подаруєме ю дакому хто ю нє ма, алє одруциме).

Систему ше меня так же ше пременї кажду єдинку у системи.

Як би ше гварело:

Розум до глави!