14. АВҐУСТ – На нєшкайши дзень народзели ше дружтвени роботнїк Йовґен Планчак и о. др Роман Миз.
1457 – Ґутенберґова друкарня у Майнцу видала першу друковану кнїжку у фарбох.
1893 – У Французкей, першираз на швеце, уведзени реґистерски таблїчки на моторни превозки.
1914 – Народзел ше учитель, новинар, писатель и дружтвени роботнїк Йовґен Планчак (Руски Керестур, 14. фебруар 1914 – Суботица, 16. фебруар 1977). Основну школу Йовґен Планчак закончел у Руским Керестуре, до Учительскей школи ходзел у Зомборе и закончел ю у Пакрацу. Потим почал робиц як учитель у Руским Керестуре. У новинох Руске слово од перших числох 1945. року бул автор гумористично-сатиричней колумни Дїдо Скубан зоз Ґаравцу полни 22 роки. Йовґен Планчак бул од 1949. року управитель школи у Руским Керестуре. Преселєл ше жиц до Суботици и єден час робел як учитель у Новим Орахове и у Суботици. Йовґен Планчак умар 16. фебруара 1977. року у Суботици дзе є и поховани.
1932 – Народзел ше священїк, публициста, новинар, прекладатель протоєрей ставрофор о. др Роман Миз (Дрогобич, Україна, 14. авґуст 1932 – Нови Сад, 13. новембер 2017). До Липовлянох у Горватскей фамелия ше приселєла 1933. року, та Роман Миз ту закончел основну школу. Класичну ґимназию, студиї, постдипломски семестри богословиї на Католїцким богословским факултету закончел у Заґребе. За священїка є пошвецени 1958. року, службовал у Липовлянох и 1968. року пришол до Нового Саду дзе бул парох по 2013. рок. Позарядово студирал историю, историю уметносци и югославянску литературу, написал вецей як тисяч статї, сотрудзовал зоз велїма новинами и часописами. Протоєрей ставрофор о. др Роман Миз преподавал на Теолоґийно-катехетским институту св. Алберт Вельки у Суботици и Новим Садзе, на специялистичних академских студийох Универзитета у Новим Садзе и на Протестанским теолоґийним факултету тиж у Новим Садзе. Сващенїк др Роман Миз добитнїк велїх припознаньох котри му додзелєла найвисша церковна гиєрархия, алє и державни орґани України як и город Нови Сад. Упокоєл ше у Новим Садзе, 18. новембра 2017. року, поховани є 18. новембра у Руским Керестуре.
1935 – Народзел ше културни дїяч у литератури Русинох у Словацкей Мирон Сисак (Пихна, Сниньски край, 14. авґуст 1935 – Прешов, 11. юлий 2018), бул професор на Универзитету у Прешове. Векшу часц свойого живота пошвецел педаґоґийней роботи, преподавал русински язик и литературу. Початком дзеведзешатих активно участвовал у процесу препороду Русинох у Словацкей, а бул и подпредсидатель Русинскей оброди у Словацкей.
Нєшка ше означує Дзень ящуркох.