Фестивал жридлового шпиваня „Най ше нє забудзе” у Дюрдьове прешлого викенду бул отримани уж по 23-раз, а шпивацка ґрупа домашнього Културно-уметнїцкого дружтва „Тарас Шевченко” ознова оправдала обчекованя на пиху своїм предходнїцом котри их учели шпивац руски народни жридлово шпиванки.
Праве тоти предходнїци, дакедишнї членїци Женскей жридловей ґрупи КУД „Тарас Шевченко” були главна инспирация и порушовач за початок орґанизованя того Фестивалу котри ма националну значносц, и далєй исти циль – пестовац руску народну жридлову шпиванку, промововац святочни народни шмати, правилне облєканє руских пасових сукньох и правилне чесанє до баршоню або фитюли. Дзекуюци велькей дзеки и витирвалосци членох Управного одбору дюрдьовского Дружтва, як и симпатизерох, после телїх Фестивалох жридлового шпиваня „Най ше нє забудзе” у нашей заєднїци єст вельо вецей шпивацки ґрупи котри пестую руску жридлову шпиванку, алє треба примерковац же би вони и надалєй були активни. Попри тим, вельо вецей уваги ше пошвецує святочним народним шматом и мелодиї наших народних жридлових шпиванкох.
Шпивацка ґрупа зоз КУД „Тарас Шевченко” зоз Дюрдьова
того року по седми раз достала награду найлєпшей шпивацкей ґрупи по думаню фахового жирия котри ма циль похвалїц найлєпших, алє и мотивовац ґрупи котри напредую. Прето того року специялну награду достала Хлопска шпивацка ґрупа Руского културного центру чийо члени зоз ошмихом и розбавеносцу шпивали шпиванки на котри публика кляпкала, та и шпивала з нїма. И побиднїцка ґрупа и ґрупа котра достала специялну награду були замерковани кед наступали, цо публика наградзовала з длугима аплаузами. Було их крашнє слухац, и патриц, алє нє було лєгко припознац же було вельо вецей ґрупи у котрих шпивали старши шпиваче.