У историї 20. вику, на парламентарних виберанкох победзели Гитлер и Мусолини, Милошевич и Вучич, Путин и Мелони, и нова нємецка наци-странка АДФ. И то список лєм на европскей териториї, и то нєвичерпни. Кед на парламентарних, демократских виберанкох можу победзовац фашистични странки, вони маю леґитимитет и, ясно, маю и леґалитет, бо победзели. Цо нам о парламентарней демократиї гутори факт же фашистични странки маю ЛЕҐИТИМИТЕТ? А очиглядно го маю, док ше зявюю у парламентарней борби. Питанє и же як маю леґитимитет демохристиянски странки (а маю го, и победзую, тиж) у 21. вику, котри зоз предходного вику нашлїдзел секуларну хвильку котра нам позната як „обовязне основне образованє”? И прецо секуларносц обовязна дзецом до 14. рокох, а зразу є нє обовязна полнолїтним особом у парламентарней демократиї?
И як вше, фашистични и други демохристиянски странки можу спреведац о спискох, резултатох виберанкох, хасную уж структурну корупцию єднак чи за финансованє, лєбо формованє явного думаня. Або, заш лєм, у першей держави модерней демократиї, у ЗАД, дзепоєдни аналитичаре споминаю можлївосц уводзеня позарядового стану пред їх наиходзаци виберанки…? Як можлїве же ше одклада виберанки (Україна), лєбо ше меня закони же би Путин остал на власци? И Путин нє єдини. Корупция и нєправилносци, у меншим, лєбо векшим обсягу провадза векшину виберанкох на швеце, и на тото зме ше уж звикли, окрем кед же обсяг корупциї, спреводзкох прешол подношлїву миру. Теди закончи у вистох.
Наш модерни швет ше утвердзел у идеї же политика, односно же политичне єство законченє еманципованя людского єства. А попри тим, тото витворенє еманципованя ше змесцує до єдного дня, на кажди два роки. Значи, свой полни политични капацитет, тот верх еманципованя, коло пейц (одприлики) милиярди полнолїтни гражданє витворюю зоз рисованьом круга коло даєдного мена на паперу, раз у двох рокох (найчастейши). И попри тим, очиглядно зме и после искуства зоз фашизмом по Другей шветовей войни, прихильни ґу тому же нє будземе образовац людзох политично. Нова тура фашизму у Европи нам нє завадза, лєбо кед нам завадза, то баржей естетске питанє, як структурно-политичне.
Прето, най повториме лекцию 20. вику, спатрену у вияви Макса Хоркхаймера: „Хто нє жада приповедац о капитализму, муши буц цихо и о фашизму”. Фашизем перше дзецко капитализму. И покля наша економия будзе заснована на капиталистичних одношеньох, фашизем, менєй, або вецей интензивно, будзе состойна часц наших животох.
Становиска висловени у тим тексту виключно авторово
и нє вше одражую ушорйовацку политику новинох „Руске слово”