17. СЕПТЕМБЕР – На нєшкайши дзень народзена наставнїца биолоґиї Амалия Гарди (1947–2018).
1853 – Народзел ше Марко Т. Леко (Беоґрад, 17. септембер 1853 – Бепґрад, 4. новембер 1932), бул хемичар, професор, академик, ректор Велькей школи у Беоґрадзе и предсидатель Червеного крижа.
1861 – У Стразбуру на нємецким язику обявени перши каталоґ поштанских маркох.
1871 – Принєшени нови школски закон у Князовини Сербиї зоз хторим физичне воспитанє, теди ґимнастика, официйно уведзене як обовязни предмет у шицких основних школох.
1931 – Ер Си Ей Виктор компания представела першу лонґ-плей ґрамофонску плочу на 33 обрацаня.
1947 – Народзела ше наставнїца биолоґиї Амалия Гарди (Руски Керестур, 17. септембер 1947 – Руски Керестур, 10. фебруар 2018). Основну школу закончела у Руским Керестуре, а Ґимназию у Суботици и Србобрану, док Висшу педаґоґийну школу, напрям биолоґия закончела у Зренянину. Робиц почала 1973. року у ОШ Петро Кузмяк як наставнїца биолоґиї, потим робела у рахунководстве и знова ше врацела до настави, до пензиї пошла 2005. року. Попри настави наставнїца Гардийова робела у рамикох школскей секциї Горякох вєдно з наставнїком Славком Папом и колеґинями Марию Бодвайову и Ирину Варґову. Вредно ше анґажовала на вельким проєкту ожелєньованя и украшованя школских будинкох. Активна була у валалских здруженьох Желєни персцень и Байка.
1991 – Перша верзия рахункарскей оперативней системи Линукс кернела (0.01) обявена на Интернету.