БЕОҐРАД – Републична виберанкова комисия (РВК) обявела Роковнїк за конченє предвиберанкових активносцох вочи парламетарних виберанкох хтори розписани за 25. октобер.
Рок за придаванє лїстинох за парламентарни виберанки 4. октобер, док рок за утвердзованє и обявйованє Збирней виберанковей лїстини у Службеним гласнїку по 9. октобер. Предкладанє подношительох виберанковей лїстини за утвердзованє статусу виберанковей лїстини националней меншини тиж мож поднєсц найпознєйше по 4. октобер. Приношенє ришеня РВК о преглашеню виберанковей лїстини муши буц найпознєйше 48 годзини од подношеня прияви порядней и благочасовей виберанковей лїстини. У тим року, РВК може од подношителя вимагац виправки лєбо дополнєнє замеркованих нєдостаткох у прияви, лєбо одбиц лїстину. Виберанкову лїстину мож поцагнуц по дзень утвердзованя Збирней виберанковей лїстини.
Термин за заключенє виберацкого списку и утвердзованє вкупного числа гласачох виходзи 9. октобра. Гражданє можу по 9. октобер, односно по заключенє Виберацкого списку, придац вимогу општинскей лєбо городскей комисиї за уписованє лєбо вименку уписа до виберацкого списку. У медзичаше, гражданє прейґ е-порталох можу превериц чи су правилно уписани до Виберацкого списку. Поволанки на гласанє гражданом муша буц доручени по 19. октобер.
Число и локация гласацких местох буду утвердзени и обєвени по 19. септембер. Домашнї орґанизациї и здруженя ше за надпатранє виберанкох можу приявиц по 17, а медзинародни и иножемни по 14. октобер.
Предвиберанкова цихосц почина 22. октобра на пол ноци и будзе тирвац по 25. октобер на 20 годзин, односно по заверанє виберанкових местох. На дзень виберанкох, гласацки места буду отворени од 7 по 20 годзин.