Швет у хторим ше можеце зобудзиц, пойсц на роботу и дознац же вам плаца прейґ ноци зменшана, лєбо же будзе пожнїц, або же о мешац останєце без роботного места, хторе ше загаши пре „поремеценя на ґлобалним тарґовищу и ланцох подмирйованя”, вшелїяк нє швет у хторим вам приємно. Окреме кед тоти „поремеценя” можу буц и пре аґресию Русиї на Україну, и пре аґресию ЗАД на Иран, и пре Хутох и пре Трампово царини, и пре одбитих аґентох АИ (штучней интелиґенциї) хтори можебуц гаковали банку вашого роботодавателя… А ту ище и локални зявеня и подоби, хторих ше нїяк нє мож ментовац…
Алє, „поремеценє на ґлобалним тарґовищу и ланцох подмирйованя” може почац и з вистку же неонацистична (по дефинициї БНД, екстремистично-правашска, и з вонкашню гибридну, а вироятно и финансийну потримовку – Ред.) партия Алтернатива за Нємецку (АфД) прешвечлїво победзела на виберанкох у восточней покраїни Саксония-Анхалт.
Кажда анализа фашизму, кельо-тельо озбильна, утвердзує даскельо нєобходни предусловия же би ше случела така вистка – економска криза (тирва з прервами од 2008.), войни на окраїску Европи и Блїзким востоку и широке пасмо дружтва хторе криза – економска, миґрантска, безпечносна, директно трафя. Худобне дружтво найвиложенше фашистичней идеолоґиї, а Саксония-Анхалт єдна з найхудобнєйших ландерох Нємецкей.
И тото цо найважнєйше, же фашизем то капиталистична идеолоґия. Док постої капитализем, дотля будзе и фашизму. Кажди раз кед капитал у кризи, вон звадзи людзох, обраци єдних процив других, же би з того конфликту витворйовал профит. З крадзу, однїманьом. Чи по закону, чи з голу воєну силу.
Фашизем понука єдноставни одвити на комплексни питаня, и швидки ришеня за зложени проблеми модерного швета. Фашизем нас ошлєбодзує od дилемох, лєбо нєлагоди же зме, можебуц, нєуспишни у живоце – бо кед же ши ше уж народзел як припаднїк Велькей нациї, вредзиш уж пре саму єй велькосц, и нїяки дальши морални, лєбо политични дилеми нє потребни. Таки приступ наисце олєгчує живот и знїма з карку терху одлучованя, лєбо одвичательносци. За одвичательне одлучованє нєобходне образованє и шлєбодни час же бизме го могли преширйовац. Кед нїч з того нє маме, окрем чувства нєлагоди и комплексу же зме швету нє доросли, фашизем нас улагої же зме ок, а же нам шицки други нєприятелє и виновати, бо нам нє идзе… Супер-єдноставне. Так стаємни розпад каждодньовосци у хторим жиєме, найшвидшу потїху достава у фашизму. А єст тельо лєпши ришеня.
Становиска висловени у тим тексту виключно авторово и нє вше одражую ушорйовацку политику новинох „Руске слово”.