Одход до пензиї значи преход з периоду живота кед особа активна, а живот єй полни зоз обовязками, алє нїяким
концом нє значи же ше и нє предлужи на таки способ. На концу то лєм преход, лєм предлуженє шицкого дотедишньго и початок нового, возбудзуюцого и нєобчекованого
Зоз Наду Колошняйову ше упознали велї ґенерациї керестурских школярох до хторих вона уткала шицку свою любов ґу тому поволаню, до тих малих людзом котри требало научиц буц людзе.
– Жаданє же бим єдного дня постала учителька, зявело ше кед сом почала ходзиц до оводи и до школи. Одтеди сом ше барз любела бавиц на учительки. Полюбела сом оводу и школу, учительку Иринку Папуґову хтора теди робела у оводи, и учительки у школи Веру Рамачову и Амалию Провчийову. Насампредз сом ше на нїх и упатрала при вибору будуцей професиї. Попри тим, так ше потрафело же кед сом закончела 10. класу, у Керестуре ше отворело оддзелєнє Педаґоґийней академиї „Жарко Зренянин” зоз Зомбора, дзе сом ше уписала и дипломовала. Родичи ме потримали у тим вибору и барз ше цешели кед сом постала учителька – толкує Нада.
Буц учителька єдно наисце окреме достоїнствене занїманє, бо добри учитель, пошвецени своєй роботи дава будучносц тим малим главком котри лєм чекаю поупивац знанє.
– Кед сом ше пошла приявиц до СИЗ-у за запошльованє, гварели ми же треба заменїц учительку у Червинки. Барз сом ше зрадовала же мам нагоду такой робиц, так же сом єдно полроче робела у Червинки. За шлїдуюци школски рок сом ше приявела за замену до Бачкей Тополї до ОШ хтора ше теди волала „20. април”, а тераз ше вола „Никола Тесла”.
Шлїдуюцого школского року ми було понукнуте же бим прешла до ОШ „Чаки Лайош”, тиж у Бачкей Тополї. Там було у плану почац з факултативним ученьом руского язика за дзеци хтори зоз Нового Орахова путовали до тей школи, и за руски дзеци у Бачкей Тополї. Дзечнє сом прилапела тоту роботу, було ми мило же допомогнєм же би нашо дзеци научели свой мацерински язик – цеши ше учителька.
О даскельо мешаци ше у тей школи отворело ище єдно оддзелєнє першей класи, так же достала и свойо оддзелєнє, а попри тим тримала и годзини дзецом од першей по осму класу хтори, як спомнуте, учела по руски. Мала вецей годзини, робела и соботами, алє єй нє було чежко и попри тим же путовала. Свою роботу барз любела, дзеци ю виполньовали зоз радосцу и кажда годзина препровадзена зоз дзецми єй давала моци же би предлужела далєй.
Фамелийни живот нє препреченє
– У медзичаше сом ше одала. О два роки ше народзел син Боян и теди уж було вецей обовязки. Кед му було рок, мушели зме го ношиц до яшелькох. Супруг робел у Вербаше, я у Тополї, а Боян оставал у Керестуре. Було ми чежко, бо сом мало часу препровадзовала зоз нїм. Окреме було чежко кед нам уведли санкциї, почало ше утарговац автобуски линиї, а зменшовало ше и утарговало и драгово трошки. Препорученє держави було же би ше зменшало число путнїкох. Потрафело ше же ше у Керестуре отверало треце оддзелєнє першей класи и мала сом щесца же сом роботу предлужела у Керестуре.
Нада предлужує:
– Же бим витримала шицки 43 роки, вельо ми помогло же сом тоту роботу барз любела, а и од супруга сом мала вельку потримовку и под час путованя док син бул мали, так и остатнї роки, понеже супруг уж бул у пензиї и дзелєл зо мну обовязки коло обисца. У Керестуре, заш лєм, було вецей часу пошвециц ше фамелиї, частейше сом була зоз Бояном хтори теди почал ходзиц до предшколского. Мая ше народзела о два роки и було вельо лєгчейше як кед Боян бул мали. Мая нє мушела так вчас пойсц до яшелькох кед сом почала робиц. Теди я вецей була зоз дзецми прето же супруг и далєй путовал на роботу до Вербасу, а познєйше до Зомбора – гвари Нада.
Дзеци пошли по своїх драгох, ми любиме путовац
Помагала сом им на початку школованя же би посцигли шицки обовязки. Обидвойо ходзели и до музичней школи, на рижни секциї и школски змаганя, мали наисце вельо школски обовязки. Обидвойо закончели ґимназию у Руским Керестуре, а потим ше уписали на Факултет технїчних наукох у Новим Садзе, на напрям рахункарство и информатика. Марияна на тим факултету закончела и мастер студиї – гвари Колошняйова.
Боян мастер и докторски студиї закончел у Минхену. Тераз роби у Лондону як инжинєр за сайбер безпечносц, а до Сербиї приходзи даскельо раз до рока. Марияна роби як софтвер инжинєр у нємецкей фирми и жиє у Новим Садзе, до котрого Колошняйово любя пойсц. Любя ше шейтац коло Дунаю, по Фрушей гори, шедзиц у Дунайским парку.
– Ми зоз супругом любиме путовац. Нащивйовали зме Бояна док бул у Нємецкей, обиходзели зме Минхен и цалу Баварску. У Лондону зме були два раз. По тераз за тото нє було барз вельо часу, алє ше наздавам же кед нас послужи здравє, будземе ище вецей часу преповадзовац у природи. Док сом робела, могли зме путовац лєм влєце кед розпуст, а теди вельо раз було барз горуцо. Тераз, понеже нє робим од 1. септембра, вихасновали зме же була красна хвиля, и нащивели Словению. Там маме приятельох и супругових колеґох. Були зме у вецей местох, медзи хторима и Копер, дзе мой супруг робел єден час. Окрем даєдних путованьох на хтори ше ми нє поспишело пойсц пре роботу и други обовязки хтори сом мала, у пензиї плануєм вецей читац кнїжки, предлужим пестовац квеце и пребувац у природи – гвари вона.
Вельо плани ма учителька Нада. Можеме єй пожадац лєм же би ше єй шицко заплановане и поспишело, на радосц и щесце, вєдно зоз цалу фамелию.
НА ЕКСКУРЗИЙОХ ЗМЕ ШЕ ЗБЛЇЖЕЛИ
– Зоз дзецми у Керестуре ми було крашнє робиц. Вишколовала сом осем ґенерациї и за кажду ме вяжу красни памятки. Любим кед их стретнєм, тераз уж одроснутих людзох хтори сом дакеди учела. Поприповедам зоз нїма, здогаднєме ше на хвильки кед були школяре, нашмеєме, и мило ми кед видзим же постали витворени людзе. У керестурским колективу сом ше добре чувствовала, добре зме сотрудзовали, черали искуства, идеї, помагали єдни другим. Водзели зме дзеци до школи у природи на Летенку, Тестеру, Златибор, Дивчибари, на Ґучево… На таких путованьох сом ше ище баржей зблїжела и зоз дзецми и зоз колеґами, а памятки на тоти днї оставаю за цали живот. През роботу у Керестуре закончела сом и Учительски факултет, вєдно зоз колеґинями у школи – гвари учителька Нада.