НОВИ САД – Перша тогорочна схадзка Координациї националних совитох националних меншинох у Сербиї отримана всоботу, 23. януара, у шедзиску Националного совиту (НС) Словацох у Новим Садзе, а найвецей бешедоване о активносцох на виробку державного Акцийного плану за Поглавє 23 у приступних прегваркох о членстве Сербиї у Европскей униї.
На схадзки Координациї повторене становиско же представителє меншинских заєднїцох нєдостаточно уключени до процесу виробку Акцийного плану о положеню меншинох, понеже анї єдна суґестия хтору прейґ своїх представительох придали национални совити и Координация на роботни тексти Плану – нє уключени до Нарису хтори концом рока придати европским институцийом.
Одношенє державних орґанох гу меншинским националним совитом илуструє и ситуация же спомнути нарис перше обявени у медийох, а дотераз є урядово анї нє доручени Координациї. Прето Координация формовала роботну групу хтора за два тижнї ма розпатриц актуални Нарис акцийного плану за меншини, а потим будзе вимагац зашеданє Републичного совиту за национални меншини.
Координация тиж меновала представительох до Роботней ґрупи за дополнєня и вименки Закона о защити правох и шлєбодох националних меншинох, з ище 2002 року. Слово о союзним закону дакедишнєй СР Югославиї, хтори теди бул рамикови закон за обласц меншинских правох, а по нїм 2002. року основани и перши национални совити, як ношителє културней автономиї меншинских заєднїцох.
На схадзки Координациї, хтору водзела єй предсидателька Ана Томанова Маканова (предсидателька НС Словацох), участвовали представителє 15 з 20 националних совитох, кельо, попри Союзу єврейских општинох, члени Координациї.
Национални совит Руснацох на схадзки Координациї представяли предсидатель Славко Рац и заменїк предсидателя Йовґен Мудри.