РУСКИ КЕРЕСТУР – Керестурска парохия св. оца Миколая вчера преславела Квитну нєдзелю по григориянским календаре, а на нєдзелю, 27. марца, у Керестуре Велька ноц. На Утринї священїк пошвецел багнїтки, хтори вирни на штирох службох Божих могли вжац и однєсц до своїх домох.
Окреме вельо вирних вчера було на Дзецинскей Служби Божей, на пол дванастей, пред хтору була и споведз за младих, а попри домашнїх священїкох, споведали и о. Яков Кулич з Коцура и о. Платон Салак з Кули. То була и остатня нагода висповедац ше пред Вельку Ноцу и на таки способ ше духовно пририхтовац за найвекше християнске швето.
Дзень пред тим була и Велька споведз, до хторей приступело красне число парохиянох, а споведали и священїки з других наших парохийох.
– На Квитну нєдзелю вирни ше здогадую триюмфалного уходу Исуса Христа до Єрусалиму, но ми знаме же правдиве преславенє бул криж – наглашел парох о. Михайло Малацко у казанї и поволал вирних же би шлїдзели Христов приклад любови и милосердия.
Служба Божа вчера служена и у малих шестрох.
