КОЦУР – У Коцуре од 20. по 22. май отримани „Днї колонизациї”, з хторима означена 70-рочнїца приселєня Сербох з Босней и Герцеґовини до Коцура. Преслава, хтору орґанизовало коцурске КУД „Завичајно врело”, понукла вецей змисти и була добре нащивена.
„Днї колонизациї” почали пияток з Країшским вечаром у дворе Основней школи„Братство єдинство”, а предлужени су соботу з дефилеом, а потим и наступами дзецинских фолклорних ансамблох КУД „Завичајно врело” и КУД „Жатва” на площи опрез Школи.
На 18 годзин у физкултурней сали Основней школи отворени етно-столи, на хторих понукнути стари и сучаснєйши сербски и други єдла, а хтори порихтали жени з валалу. Отворена и вистава малюнкох з тогорочней Подобовей колониї „Коцур”, хтора була пошвецена рочнїци колонизациї, так же виложени малюнки инспировани з тоту тему.
Була отворена и вистава фотоґрафийох, за хтору позберане вельке число старих фотоґрафийох колонистох и їх потомкох, як и фотокопиї документох хтори шведоча о колонизациї. Преслава предлужена з промоцию кнїжки „Длуство старому краю” авторки Весни Радошевич Пешут.
Други дзень преслави закончени з концертом у Доме култури, на хторим наступели домашнї КУД „Завичајно врело”, КПД „ДОК” и КУД „Жатва”, як и госцински ансамбли КУД-ох з Ґайдобри, Кляїчева, Младенова и Вербасу.
Преслава вчера закончена з програму „Здогадованє на Бранка Чопича”, на хторей наступела дзецинска ґрупа КУД „Завичајно врело”, а означованє ювилею заварте з монодраму „Бог те мазо” хтору, у режиї Тому Курузовича, а у продукциї Народного театру Шабац, одбавел ґлумец Ґоран Караїч.