РУСКИ КЕРЕСТУР – Початок циклусу розгваркох з представителями националних совитох националних меншинох у Сербиї, представителє Делеґациї Европскей униї (ЕУ) у Сербиї почали праве з руску меншину, односно з вчерайшу нащиву Националному совитом (НС) Руснацох, дзе з домашнїма бешедовали совитнїк и шеф Политичного оддзелєня Делеґациї ЕУ Лука Бянкони и совитнїк за питаня демократизациї Ґордана Рацкич Николич.
О положеню и витворйованю правох Руснацох у Сербиї госцох з Делеґациї ЕУ у канцелариї НС у Руским Керестуре упознали подпредсидатель Совиту Микола Шанта, предсидатель Вивершного одбору Совиту Желько Ковач, предсидатель Одбору за информованє НС Иван Сабадош и секретар НС Таня Арва Планчак.
Делеґация ЕУ у Сербиї прейґ нащивох и розгваркох з националнима совитами жада дознац яке конкретне положеня меншинох и витворйованє їх правох, окреме у образованю на мацеринским язику; яке сотруднїцтво совитох з локалнима власцами, яки стан у информованю на мацеринским язику, у витворйованю правох на службене хаснованє язика и писма, та яка заступеносц припаднїкох меншинох у орґанох локалних самоуправох.
Госцох интересовало яки тераз актуални стан у образованю по руски, яки становиска НС о билинґвалним образованю, о видаваню учебнїкох, кельо и як наш НС бул уключени до прешлорочних, та знова наявених пременкох Закона о националних совитох, о улоги Координациї НС як партнера держави, дзе домашнї визначели же потребне вельо векша активносц и постояцого Совиту за национални меншини при Влади РС.
Представительох ЕУ у Сербиї интересовало и конкретне витворйованє правох на службене хаснованє язика и писма у локалних штредкох дзе Руснаци на тото маю право, хаснованє документох и по руски, та яка заступеносц Руснацох у орґанох локалних управох.
Бешедоване и о информованю по руски на уровню Войводини и у локалу, а попри уж дефинованя информованя як явного интересу, представителє НС Руснацох спозорели же би компетентне министерство тот явни интерес мало дефиновац и за информованє на язикох меншинох, пре терашнє обовязне приватизованє локалних медийох.
