СЕРБИЯ – Польопривреднїки котри маю трактори, мотокултиватори, комбайни и други машини за роботу у польопривреди, а нє маю документацию о походзеню и власнїцтве превозки, до конца рока их можу реґистровац у подручней полицийней управи.
Дополнєня Правилнїку о реґистрациї моторних и приключних превозкох, оможлївели польопривреднїком реґистровац превозки старши як пейц роки гоч за нїх страцели рахунок. То мож и кед правне лїцо од котрого купели превозку вецей нє активне, лєбо кед физични лїца од котрих купели тоти превозки умарли, та нє мож достац одвитуюци доказ о власнїцтве и походзеню превозки.
Окрем вимоги за реґистрованє превозки, польопривреднїки маю придац и доказ же ше занїмаю з польопривредну продукцию, оверену вияву же найменєй пред пейцома роками купели тоту превозку, потвердзенє же превозка технїчно исправна, а воно нє шме буц старше як 30 днї.
Ґу тому, треба придац и полису обовязного осиґураня власнїка моторней превозки за можїву чкоду, доказ же уплацени предвидзени трошки за уписованє превозки до єдинственого реґистру и видаванє транспортней дозволи, реґистерских таблїчкох и налїпки. За потвердзованє идентитету, физични лїца треба же би придали леґитимацию, а правни лїца доказ же су уписани до реґистру у одвитуюцим орґану.