РУСКИ КЕРЕСТУР – Всоботу, 6. октобра, у центру валала була отримана манифестация „Домашнї шпайз” котру орґанизує Здруженє женох „Байка” уж седми рок за шором.
Попри даскельо домашнїх штандох, на манифестациї учасвовали и два штанди женох з Руменки котри тиж понукали свойо продукти. Нащивителє мали нагоду купиц насампредз жимнїцу, рижни безалкоголни и алкоголни напої, колачи, як и продукти и сувенири власней роботи.
Як толковала предсидателька „Байки” Славица Катона, манифестация ма традицию єден рок длугшу як цо иснує здруженє, циль єй же би жени попредали жимнїцу котру пририхтали, а з другого боку же би нащивителє мали нагоду купиц прави домашнї продукти чий квалитет виєдначени зоз здравима продуктами, а по ценох вигоднєйши.
