СРИМСКА МИТРОВИЦА – Вчера, 7. децембра, у рамикох Културней манифестациї „Днї Миколи Кочиша” и календару означованю рочнїцох у тим року Дружтва за руски язик, литературу и културу, у Културним центре у Сримскей Митровици з културно-уметнїцку програму означена 70-рочнїца народзеня Нади Колєсар Адамович, наставнїци музики зоз Сримскей Митровици, народзеней 1944. року у Бачинцох.
На програми участвовали школяре котри виучую руски язик у ОШ „Йован Попович” у Митровици и почитователє Надовей творчосци з Дружтва „Руснаци”.
Спред Дружтва за руски язик Ирина Папуга Нади Колєсар Адамович уручела Припознанє з меном учителя Осифа Фа, хторе єй додзелєне за окремне закладанє у обласци музичней педаґоґийней дїялносци медзи Руснацами и ширше.
Тиж так, на програми наставнїци руского язика Моники Абодї Митрович придата кнїжка Заводу за културу войводянских Руснацох „Червене пупче”, а школяре рецитовали стихи Миколи М. Кочиша и Гавриїла Костельника. Руски шпиванки одшпивала женска шпивацка група Дружтва „Руснаци”, а на клавиру их провадзела праве ювилантка, Нада Колєсар Адамович.
До Секциї Дружтва за руски язик у Митровици прияти тройо нови члени – Драко Тур, Микица Йованович и Душанка (Чордаш) Костич.
Пред програму у Културним центре, на 10 годзин сримскомитровицки парох о. Владислав Варга у нашей церкви служел Службу за покойних членох Дружтва за руски язик, литературу и културу з того Городу.
