РУСКИ КЕРЕСТУР – У рамкох „Дньох Миколи М. Кочиша” вчера у просторийох Месней заєднїци у Руским Керестуре означени рочнїци двох наших визначних руских преднякох, родом Керестурцох – 140 роки народзеня владики др Дионизия Нярадия и исто тельо роки народзеня пароха керестурского о. Михайла Мудрия.
О владикови Нярадийови бешедовал виглєдовач його живота и роботи о. мр Михайло Малацко, котри визначел вельку владикову улогу на рижних польох нашого вирского, народного и национално-културного живота як оца и пастира, та духовного оца шицкей тедишнєй рускей интелиґенциї.
О живоце и роботи велького руского патриоту и народного предняка о. Михайла Мудрия реферат пририхтали школярки штвартей класи руского оддзелєня Ґимназиї „Петро Кузмяк” Марияна Колошняї, Кристина Малацко и Татяна Ґовля.
О. Михайло Мудри бул єден зоз сновательох и перши предсидатель Руского народного просвитного дружтва 1919. року, у сотруднїцтве з о. Дюром Биндасом, та владиком Нярадийом.
О виданьох Дружтва за руски язик, хторе зоз свою Секцию у Керестуре було орґанизатор програми, бешедовали Ирина Папуґа, проф. др Юлиян Рамач и мр Гелена Медєши.
Програму з литературнима и музичнима точками прикрашели школяре керестурскей Школи Давид Надь и Александер Киш, керестурского Оддзелєня ШОМО Емилиян Няради и Дзивоцка ґрупа Дому кулури. Модератор програми була секретарка керестурскей Секциї Дружтва Мария Дорошки.
Представителє Дружтва и домашнїх потим положели квеце на гроби владики Нярадия у крипти Катедралней церкви св. оца Миколая, дзе ше здогадли и на владику Йоакима Сеґедия, котри ше упокоєл пред 10 роками.
