У рускей Ґимназиї 10-еро школяре
У першим кругу хтори тирвал 8. и 9. юлия до руского оддзелєня Ґимназиї були розпоредзени 9-еро школяре, од хторих 7-еро зоз Керестура, єдна школярка зоз Вербасу и єдна зоз Дюрдьова хтора и перша на лїстини розпоредзених школярох. До сербского оддзелєня Ґимназиї були розпоредзени 19-еро школяре, а на напрям туристични технїчар 20-еро школяре.
После другого уписного кругу, до Ґимназиї на сербским язику уписана ище єдна школярка, та их вкупно будзе 20-еро, док до Ґимназиї на руским язику уписана тиж ище єдна школярка, та од септембра до рускей Ґимназиї руша вкупно 10-еро школяре. Число школярох на напряму туристичного технїчара ше нє пременєло.
З оглядом же шицки три оддзелєня у керестурскей Штреднєй школи и ґимназиї предвидзени за по 30 школярох, мож обчековац ище новоуписаних школярох, понеже у шицких єст шлєбодни места.
„Червена ружа”
На тогорочним 58. Фестивалу рускей култури „Червена ружа” хтори отримани 28. юния у Велькей сали Дома култури, кошарку червених ружох достала Валентина Салаґ зоз Дюрдьова за интерпретацию композициї „Шерцо з каменя” авторох Мирослава Сивча и Славка Романа Ронду. Награду за найлєпшу авторску композицию, „Драга далєка”, достала Кристина Афич, док награду жирия за цалосни наступ достал Мирослав Малацко з композицию „На концу конца” автора Мирослава Папа.
Попри спомнутих побиднїкох, на тогорочней Ружи змагали ше и Даниєла Горняк зоз Сримскей Митровици з композицию „Рано” авторох Даниєли Горняк, Душанки Костич и Мирослава Папа. Арсениє Вуйович зоз Беоґраду наступел з композицию „Ошмих и погляд” авторох Драґана Новаковича и Мирослава Папа, а потим Дзивоцка шпивацка ґрупа зоз Дюрдьова хтору творя Мария Барна, Ивана Цап, Лидия Вереш, Тамара Чордаш, Лидия Кухар, Ана Радишич и Тамара Салаґ, а чий наступ провадзели Василиє Кочиш и Александар Човс на ґитарох и Михайло Олуїч на кахону, наступели зоз познату руску писню автора Якима Сивча „Модерна любов”(,,Вше ше людзе любовали”). Тамара Салаґ и Лидия Кухар зоз Дюрдьова наступели зоз шпиванку „Волам це” авторох Александра Човса и Мирослава Папа, а коцурска рок ґрупа „Демиґод”, чийо члени Петар Иван, Зденко Фаркаш, Атила Силвестер Конц, Стефан Надьлукач, шпивачка бенду Танита Ходак, як и провадзаци вокали Дарина Михняк и Катарина Кулич, наступели зоз свою авторску композицию „Польо чарних ружох”.
„З нами у слами”
Перши дзень дводньовей манифестациї „Коцурска жатва”, 12. юлия закончени зоз активносцами котри пририхтали млади. Того року було кус иншак як прешли роки, млади поволали екипи за участвованє у квизу „З нами у слами” котри бул у кафичу „Оаза 2”.
Орґанизаторки – Мелания Мали и Емилия Чизмар пририхтали змаганє у знаню о рускей традицийней и поп култури. Екипи котри ше змагали одвитовали на питаня зоз обласци литератури, музики, обичайох…
Змагали ше екипи зоз Коцура, Руского Керестура и Нового Саду, а шицко прешло у барз добрей атмосфери.
По законченим квизу млади предлужели друженє на журки, а старши мали нагоду уживац у забавним вечару на Площи опрез Руского дому дзе грал оркестер „Жатви” вєдно з оркестром „Карпатох” з Вербасу.
,,Дюрдьов отвореного шерца”
Всоботу, 27. юлия, у центру Дюрдьова на спортским полиґону отримана 5. Манифестация ,,Дюрдьов отвореного шерца”.
Того року наступели бенд „100’s i prijatelji”, ди-джей MtHaza, а главна гвизда на тогорочней манифестациї бул Желько Бебек зоз своїм бендом. Програму провадзели коло три тисячи нащивителє.
Як уж и традиция, Здруженє „Зєдинєни фарби звука”, коло музичней програми, занїма ше и зоз промоцию туризма и польопривреди, та так и того року на спортским полиґону бул поставени штанд зоз дюрдьовскима ґереґами и продуктами з ґереґи ґаздовства Шовлянски.
Волонтере зоз Голандиї були у Коцуре и Вербаше
Млади волонтере уж даскельо роки приходза до Сербиї у орґанизациї Реформаторскей церкви зоз голандского городу Миделхарнису у сотруднїцтве зоз Канцеларию за помоц Восточней Европи. У Сербиї пребували дзекуюци добрей координациї зоз Євангелску церкву зоз Коцура.
З тей нагоди робели на обєкту Здруженя за помоц ментално нєдостаточно розвитим особом ,,Хижка“ у Вербаше.
„Водицов камп 2019”
„Водицов камп 2019 тирвал од 8. по 11. авґуст, на нїм участвовали коло 80-еро младих зоз 12 местох, а лидере Кампу були Тереза Будински и Иван Чизмар
През штири днї, учашнїки Водицового кампу мали нагоду упознац историю Водици, та роздумовац на тему „Святи Дух и плоди и дари св. Духа и Марияˮ котру обробел, прилагодзел и виложел о. Михайло Малацко. Попри духовней часци, учашнїки розправяли и о еколоґиї, опасносци и зависносци од интернету и о проєкту „Нула гладуˮ, по котрим би по 2030. рок у швеце вецей нє було гладних, а котри порушали орґанизациї Зєдинєних нацийох за поживу и польопривреду (ФАО). Попри тим то була нагода и за друженє и упознаванє нових товаришох, а як дознаваме єдно зоз интересантрнєйших збуваньох було тематске друженє – Кавбойски вечар.
„Heart Rock Fest”
На Городским стадиону у Вербаше всоботу, 10. авґуста, отримани други по шоре Heart Rock Fest.
Популарни рок бенди наступели пред коло двома тисячами Вербащанох, алє и нащивительох зоз велїх околних местох. Публика мала нагоду уживац у добрим звуку наших познатих ґрупох.
Фестивал почал зоз писнями ґрупи Майдан, а после нїх наступели домашнї „Ничим изазван” на чию инициятиву и порушани „Heart Rock Fest” прешлого року. Шлїдуюци на бину вишли члени ґрупи „Велики презир”, а за нїма Деян Цукич и „Спори ритам бенд”. Нащивителє уживали и у писньох ґрупи „Неверне бебе”, а фестивал закончени з наступом ґрупи С.А.Р.С.
Heart Rock Fest и того року, як и прешлого, бул гуманитарного характеру. Шицки котри купели карту за концерт уключели ше до гуманитарней акциї збераня средствох за Наташу Ґайдош з Коцура, за протезу котра єй нєобходна.