РАКОВАЦ – Членїци Активу женох КУД „Жатва” зоз Коцура участвовали на Фестивалу єдзеня и добрих смакох под назву „Алє ше дакеди добре єдло” (Ал´ се некад добро јело, баш), котри уж тринасти рок у Раковцу зашором орґанизує локалне Здруженє „Горска ружа”.
Фестивал облапял и предайни базар на котрим участвовали 25 викладателє зоз шицких крайох Войводини. Числени нащивителє ше зберали коло цифрованих и богатих столїкох шицких викладательох, а з тей нагоди могли коштовац у домашнї колачи, кифлочки, вина, палєнки, рижни файти сира и меду, и инше. Тото цо збогацело тот Фестивал було и вельке понкукнуце ремеселнїцких продуктох и уметнїцких дїлох.
Членїци коцурского Активу женох за тоту нагоду порихтали рижни лакотки, сладки и слани єдла, а столїк прикрашели зоз краснима ручнима роботами з рускима мотивами. На столїку коцурских женох була и нєзаобиходна бабка у руским народним облєчиве.
Инициятиву членох Здруженя „Горска ружа” же би ше назберани пенєж од предаваня єдзеня унапрямело на гуманитарну намену потримали шицки здруженя женох котри участвовали на Фестивалу того року. Так, назберани средства достала овода у Раковцу, же би их похасновали за опреманє своїх просторийох.
Фестивал єдзеня „Алє ше дакеди добре єдло” орґанизовало Здруженє „Горска ружа”, з потримовку и покровительством Општини Беочин и Покраїнского секретарияту за привреду.
