Нєдавно префункционовал сайт kosibreti.rs. Идея власци, кед тот сайт наявени, була же би гражданє на єдним месце могли приявиц безочносц, нєчесносц, крадзу, лєбо други ствари хтори нє иду нїяк зоз явну функцию, лєбо державну институцию, без огляду на уровень власци. Зоз єдного боку то супер идея, понеже людзе на тот способ можу приявиц шицко гевто цо их „жуля”. Безпомоцни – напишце писмо и проблем будзе ришени. Институция нє роби свою роботу – напишце писмо и проблем будзе ришени. Паркира вам ше локални аґа на место за инвалидох, лєбо закупене место – напишце писмо и проблем будзе ришени. Супер, гей?
Га баш и нє, а ниа и чом. Перша аномалия же о тим сайту цали час бешедує лєм предсидатель Републики. Вон наявел сайт, вон толковал як сайт функционує, вон бешедує о тим цо мучи людзох, вон бешедує о тим хтори проблеми ришени. Можебуц же сайт його идея, алє нє знам дзе то у Уставу Сербиї пише же предсидатель Републики треба же би ришовал проблем триманя швиньох у квартельним будинку. Нє видумуєм, наисце то бул єден зоз проблемох хтори ришени. И нє мам проблем зоз тим же ситуация зоз швинями ришена, мой проблем тот же ше то хаснує за особну промоцию – праве вон ришел проблем, бо други нє можу, лєбо нє знаю. И тераз маме нови уровень аномалиї: за гореспомнути швинї постоя даяки предписаня, инспекциї, орґани хтори би требали ришовац тот проблем, алє вони то нє поробели. Исте важи и за ришованє социялного статусу, асфалтованє драгох и так далєй: постоя институциї хтори би то требали ришовац, алє то нє робя и то ше так одтаргло контроли же ше предсидатель Републики муши уключиц до ришованя проблемох, a зоз тим до явносци посила слику о тим же праве вон може ришиц кажди проблем. Нє инспекция, полиция, комунална полиция, алє вон. Вебер, Муд, Левицки и други мудри людзе писали о подобних прикладох и тото цо резулат такого справованя и наисце препоручуєм же бисце пречитали голєм даяки сиже о тим цо ше нам у пракси случує и яке то опасне. И тераз конєчно сцигуєме и по трецу аномалию: тельо ше бешедує о ришованю проблемох, а нє бешедує ше о тим цо поробене же би ше проблем нє зявел ознова. Анї слово о санкцийох за институциї, лєбо поєдинцох хтори нє робя свою роботу, анї слово о пременки системи лєбо правилох же би ше така ситуация вецей нє случела. То вам яґод кед би вам авто нє сцел запалїц бо вам акумулатор празни, а ви ше нацагуєце зоз радийом бо сцеце музику у авту – хтори нє роби. Гат, риш гевто цо наисце проблем, та нє будзеш трациц час анї на пошлїдки проблему. Лєбо на нашим прикладу, оправ институциї, та и система прероби. Єдноставне, нє?
Становиска висловени у тим тексту виключно авторово и нє вше одражую ушорйовацку политику новинох „Руске слово”.