РУСКИ КЕРЕСТУР – Атлетски клуб „Русинˮ, штварток 15. децембра, у школскей сали у Руским Керестуре, орґанизовал клубске змаганє у скаканю до висока на хторим участвовали коло 45-еро дзеци, подзелєни до 9 катеґорийох спрам возросту.
У ґрупи наймладших хлапцох предшколского возросту, 1. место завжал Стефан Дороґхази, 2. бул Филип Папуґа, а 3. место завжал Лазар Тасич. У ґрупи дзивчатох предшколского возросту, 1. место припадло Ани Миладинович, 2. була Лена Дороґхази, а треца Ива Сендерак.
У трецей ґрупи змагали ше дзивчата тиж предшколского возросту, та 1. место у тей ґрупи припадло Мануели Береґ, 2. була Нора Медєши, а 3. место завжала Маша Дудаш. У штвартей ґрупи змагали ше хлапци од 1. по 3. класу основней школи дзе Лука Тасич завжал 1. место, 2. бул Лука Бандич, а 3. бул Серґей Сабадош.
После хлапцох наступели и дзивчата 2. и 3. класи основней школи, та у тей ґрупи найлєпша була Кира Пап, 2. була Елена Ґолубович, а 3. место завжала Ела Колєсар. У шлїдуюцей, 6. ґрупи, змагали ше хлапци 4. и 5. класи основней школи, и ту ше найлєпше указал Єлисей Пап, потим 2. бул Дюла Фаркаш, а 3. место виборел Ерик Русковски. После хлапцох, на шор пришли и дзивчата 4. класи, та у тей ґрупи найлєпша була Николина Гарди, потим Катарина Дудаш, а вец и Адриана Штранґар.
У предостатнєй ґрупи наступели дзивчата 5. и 6. класи, дзе найвисше скочела Силвия Папуґа, потим Кристина Сопка, а ту и Йована Фаршанґ. И на концу, у 9. ґрупи Русинових младих атлетичаох наступели дзивчата 7. класи, дзе Саня Кандрач прескочела найвисше, док Аня Колошняї завжала 2. место. На концу, ревиялно наступел и атлетичар Теодор Штранґар, хтори у своїм возросту, 7. класа, нє мал конкуренцию, та пробовал звекшац свой особни рекорд.
Тренер младим атлетичаром, Саня Еделински з тей нагоди, на помоци коло орґанизациї подзековала єй помоцнїци Валентини Тиркайла, бувшому атлетичарови Даркови Чернокови, потим атлетичаром старшого возросту хтори ше нє змагали у тей дисциплини, а тиж и родичом шицких учашнїкох хтори обезпечели закуску за дзеци и на тот способ допринєсли ище лєпшей атмосфери после змаганя.
