РУСКИ КЕРЕСТУР – Стреду, 7. децембра на Драмским мемориялу Петра Ризнича Дядї одбавена представа за дзеци „Бал”, хтора була и премиєра.
У режиї ше опробовала наша млада ґлумица Адриана Надь Барна, а текст написал Сашо Палєнкаш.
Публика у преполней сали керестурского Дома култури потримала ґлуму Яни Варґа, Ксениї Катрина, Маї Надь и Валентини Гарди, хтори зоз початкову трему хтора присутна и при старших ґлумцох, одведли публику до швета у хторим ше бори добре и зле, вичне роздумованє цо дзецом и кеди дошлєбодзене и кеди преходза до швета одроснутих.
Дзеци сцу цо скорей вироснуц, а старши жадаю же би цо длужей були дзеци, ошлєбодзени од каждодньових бриґох. У представи представена и вична борба добра и зла, дяблика хтори нагваря и бере душу и ангела хтори наводзи на добре.
Костими були прави сказково, шветло мало вельку улогу – червене представяло пекло, жовте шветло рай и добре були прилагодзени хвильком у представи.
Треба похвалїц и шминку, хтора при малей принцези була символична – пол твари, хтора була нашминкана представя швет одроснутих, нєнашминкана половка твари то дзецинство.
И остава питанє чи дзецом предчасово место там дзе ходза лєм старши, чи нє?
