(цо шицко 100% задармо одкеди ше єдного пиятку зацмело за 14+2)
Фраза Чарни пияток, або Black Friday, одноши ше на дзень после америцкого националного швета Дня подзековносци. Вираз ше перше одношел на очежани и нєфункционални транспорт после числених фамелийних нащивох, а даскельо дзешатки роки познєйше дефиновал точку у року кед тарґовци преходза «зоз червеного на чарни» заробок пре звекшани потрошацки кошарки док тирваю швета. Остатнї 20 роки, у цалим швеце, яґод на команду, уж дзешка стредком новембра почина ше наявйовац нєвироятни цени, дутяни и тарґовински центри понукаю огромни попусти и ґратис продукти, предавальнї робя длужей и почина зявенє хторе ше вола позитивна повратна капча, односно, кед звекшованє прициску, або даякей сили на уходзе резултує з векшима прицисками на виходзе, цо знова дава ище вецей сили на уходзе. Подобне як кед микрофон почнє лапац власни звук зоз звучнїкох, и вец го знова враца назад до звучнїкох и нараз почнє боляцо пищац.
У нас ше чарни пияток здобул пред роком. Салдо бул превельки. Нє було росту ценох, алє лєм росту гнїву и ришеносци зопрец ше коруптивней, забивацкей власци. Позитивна повратна капча у полним своїм розмаху залапела шицки городи, валали, та и найменши улїчки, и од теди пищи цала Сербия на микрофони националних и интернационалних медийох. Алє цо? Кед пищалку до рукох вжали правдиви тарґовци, гевти хтори наисце одлучую о тим же цо и кеди будзе на акциї у нашей жеми, 100% знїжени и НИС, будинок Ґенералштабу, Пионирски парк, та и цали Беоґрад на води и на жеми, улїчка Модени у Новим Садзе, та и будинок Дневника, старей телевизиї и новей Гайзибанскей станїци. У Вербаше уж розпредата цала индустрийна зона, ЯКП «Стандард», автобуска станїца, та и даєдни защицени културни обєкти, а кельо будинки у вашим месце стоя зруйновани, накривени чекаюци акцийне валянє (нє ценох, алє мурох)? Кед ши медзи тима з глїбоку кишенку, купиц мож и национализем, идеализем и фанатизем, за схопнєйших розбиванє глави, а за креативнєйших гроженя зоз кланьом. И индекс и ветеранска шапка. И сафари.
Нє пиятки, алє чарни часи нам предали шицку жем у Войводини, та до каси сцигнє лєм гевтот напредок порадзени, одкупени цали рудокопи, та и цали Златибор, Дивчибари, лєси порубани и викерчени за нови будинки на предай, а дотля нам рики за дробни пенєж одняти за вилїв одруткох и канализациї. Кед рафи випражня тоти маєтнєйши, останє нам лєм шмеце и пластика. И рати за цудзи кредити. Повратней капчи ту нєт, лєм у єдним напряму идзе тота тарґовина.
А чи и ви будзеце цо купиц и кельо вас то будзе коштац?
Становиска висловени у тим тексту виключно авторово и нє вше одражую ушорйовацку политику новинох „Руске слово”.