КОЦУР – Традицийни Крачунски концерт Културно-уметнїцкого дружтва „Жатва” отримани штварток вечар, 8. януара, у Велькей сали Дома култури у Коцуре.
Святочни концерт зоз шпиванками отворел Церковни хор Грекокатолїцкей церкви Успения Пресвятей Богородици под руководством Александра Планкоша, а потим виронаучни дзеци котрих пририхтала вироучителька Ксения Бесерминї представели венчик колядох и рецитацийох у драмскей слички.
Шлїдзели танци наймладшей фолклорней ґрупи КУД „Жатва” котрих порихтали Александра Горняк и Микола Ґайдош, як и танци Стреднєй фолклорней ґрупи зоз КУД „Завичайне врело” хореоґрафа Николи Павловича.
Коляду одшпивали и Андрей Горняк и Мирослав Бесерминї, а зоз пар шпиванками ше представели и млади „Жатвово” шпиваче, як и Катарина Бесерминї и Ивана Сакач котрих порихтали Марко Буила и Марина Тодич. У програми участвовали и школярка Тара Бокан зоз пригодну рецитацию, а стихи гуторели и Ана Тимко и Єлена Тимко. З танцом програму прикрашели и стредня и старша фолклорна ґрупа домашнїх КУД „Жатва”, як и госци зоз РКЦ з Нового Саду.
Програма Крачунского концерту того вечара, котру водзела Патриция Будински, облапяла крачунски змисти, коляди и крачунски винчованки, шпиванки и рижни танци.
Числена публика виполнєла Вельку салу Дома култури, а кажда точка Крачунского концерту була наградзена з гласним аплаузом.
