Борисе Давидовичу, нє дайце ше пшим сином!

автор А. Деянович
268 Опатрене

Гевтому зоз значку и пендреком хтори копал до седемдзешатштирирочного дїда, гевтому з поршеом и досиєом хтори з песцу до глави бил виплаканого чловека, гевтому з гладну суєту хтори мишал цудзу пасулю, гевтому хтори клєчал и модлєл опрез и у мено ґимназиї… Нє дайце ше тим…!

Зоз протестами хтори уж три тижнї орґанизую студенти, блокираюци роботу универзитетох и факултетох, поволує ше же би пред законом одвитовали гевти пре чию нєфаховосц або корумпираносц 17 особи настрадали (15 погинули,  а два чежко покалїчени), алє и гевти хтори познєйше били студентох на мирних протестох. Так єдноставно одкочене думанє же тото нє прейдзе. Так єдноставно, ришено, одвичательно и шмело тоти млади людзе порушали револуцию роздумованя и парадоксално, без вельо мудрованя, указали же цо думаю о системи и дружтве. Випатра вироснул гевтот над хтори тераз вше гласнєйше почина шущац: „У цара Миди кожи уха”.

Вони конкретизовали тоту емоцию и зоз свою енерґию порушали дзешатки тисячи людзох на реакцию же нє мож предлужиц жиц у таким дружтве, же тото муши буц Дамоклов меч тей власци и же раз муши спаднуц и пререзац ґузел хтори дави вше баржей. Страх кед преходзиш попод даяку стреху ище швижи, алє и гевти старши нє шмеме забуц: же спаднє закрице у прастарим доме здравя, оводи, школи або и у швижо реновираним будинку, же ши годзен  настрадац у авту на наплатней рампи, буц зґажени зоз воєним танком або це забиє автобуске колєсо у стред билого дня, а и кед прежиєш, поцерпаш же це до шпиталю  буду вожиц на геликоптеру хтори скруци там дзе гварел политичар…  И з каждим случайом шмерци за хтори нїхто нє одвитовал, доставаш ище єдну карту на верху нєфаховосци, корупциї и партийного полтронства. Стреха, нажаль, гевта перша карта хтора спадла зоз и так розкиваней, на чудо наскладаней пирамиди тей власци хтора будує так же валя, и моцнєє так же биє. (И забива?)

Цо ше дотика шицких хторих означели студенти и гевтих з тексту, алє и гевтих у сушедстве хтори тоти злодїйства потримую, вам нїхто нє заплаци за поробене. А можебуц думаце же сце ище и длужни? Наздавам ше же будзеце одвитовац, алє нє бойце ше, лавка на хторей будзеце шедзиц нє будзе анї єдна з гевтих под стреху опрез гайзибанскей станїци у Новим Садзе под хтоу, нажаль, шедзели седемнацецеро людзе.

Зоз шерцом як бубном и думку як шерпом, студенти ясно дефиновали хто патриота, яку державу сцу, и вони и тоти дзеци з дня на дзень нам указовали же важне думац на других и за цо ше мушиме бориц. Знова парадоксалне чи зошицким оправдане, дзеци нас порушали ошвициц Славию, Беоґрад и цалу жем и бориц ше за тото єдине за цо шицки станєме, єдине цо нам святе, абсолутне – дзеци.

У року кед сом почувствовала привилеґию и чесц започац кариєру универзитетского професора, мам ище векшу привилеґию – учиц од нових ґенерацийох, колеґох о критичним думаню, явним виражованю, витримовносци и одвичательносци.

Щешлїво колеґове и нє дайце ше! Знова зоз индексом у рукох, студентка Филозофского факултету у Новим Садзе.

ПОВЯЗАНИ ТЕКСТИ