РУСКИ КЕРЕСТУР – Подросток Фодбалского клубу „Русин”, стреду 12. априла, на домашнїм Ярашу одбавел 10. коло од початку сезони у своєй Подручней младежскей лиґи процив екипи Станишич, зоз резултатом 1:2 (0:1). Ґол дал Желько Максич.
У першей половки стретнуца, у 20. минути, госци дали перши ґол кед їх троме бавяче виведли акцию по лївим боку. У другим полчасу русиновци пробовали одбавиц пресинґ на їх половки, прициснуц их, та на центершут Бикия зоз правого боку, Желько Максич зоз волейом дал красни ґол.
Єден час резултат бул нєришени, медзитим нєодлуга госци одняли русиновцом лабду зоз своєй половки, Лука Иличич остал покалїчени лєжац на жеми, цо процивнїки у тей хвильки вихасновали и виведли контранапад хтори и реализовали. По конєц остало ище коло 30 минути, у хторих Русиново бавяче мали ище даскельо полушанси, медзитим даякей озбильнєйшей акциї нє було з оглядом на наисце моцного процивнїка.
Русин наступел у составе – Мирослав Молнар, Андрей Дудаш, Мирко Надь, Владимир Кочиш, Лука Иличич, Желько Максич, Марио Иличич, Кристиян Надь, Алексей Бики, Александар Тома, Иван Планчак и Божидар Чонка.
Шлїдуюце стретнуце млади русиновци одбавя шлїдуюцого викенду у Бачким Петровцу процив екипи Младосц, а хтора такой на 5. месце, та ше з тей нагоди обчекує и вельку борбу.