РУСКИ КЕРЕСТУР – И того року, по традициї, Дїдо Мраз обишол и керестурски дзеци, хторим подзелєл 80 новорочни пакецики вчера у Спортскей гали.
Тото збуванє пред жимски швета, по пиятираз за шором, орґанизовала Месне заєднїца Руски Керестур, а пакецики финансовали родичи.


Пригодни пакецики, у хторих, попри лакоткох були и найновши виданя кнїжкох за дзеци НВУ „Руске словоˮ, Дїдо Мраз подзелєл шицким присутним дзецом, хтори му за пакецик подзековали зоз рецитацию або шпиванку по своїм виборе.
Друженє з Дїдом Мразом ше потим предлужело так же му дзеци поставяли рижни, интересантни питаня у складзе з їх возростом, на хтори би им вон одвитовал у своїм препознатлївим, гумористичним стилу.
