Гражданє Нового Саду и околних населєньох уж даскельо остатнї тижнї нє на мире и у дилеми кед постаню смиядни, а то ше по тей горучави случує на кажду годзину-два – нїхто нє начисто чи вода з новосадских чопох за пице, чи нє.
Теми тей колумни би нє було кед би штредком авґуста до новосадскей явносци нє пречурела интерна електронска преписка руководзацих у городским ЯКП „Водовод и канализация” дзе єден од руководительох на ґрупи пише же Институт за явне здравє Войводини пренашол у води нематоди (длуговасти округляви хлїсти) и же є биолоґийно нєдобра. По тим, требало би ю дочасово преглашиц за технїчну воду хтора нє за пице, покля ше нє очисци од инфестациї за цо, надпоминаме, предписана стандардна процедура. И, розуми ше, о тим такой информовац трошительох хтори, на концу, плаца комунални рахунки з обчекованьом же достаню чисту и безпечну воду за пице.
Медзитим, явносц о тим нє дознала од одвичательних, алє доокола, од городскей опозициї. Понеже нам политична сцена така яка є, одгук було лєгко предвидзиц – лєбо опозиция подклада ногу власци, та гоч и знємирює явносц, лєбо шицко правда, а власц скрива свою нєкомпетентносц. Гоч як, лєм даскельо годзини як цо нематоди постали вирални, у новосадских предавальньох скоро же нє було купчей води за пице, окреме у балонох – шицко розпредане.
Аж кед ше новосадска явносц збуртала, городоначалнїк наложел най ше ствар урґентно випита, а потим ше оглашел и „Водовод” зоз сообщеньом же вода за пице добра, и же порушаю шицки правни мири спрам одвичательних за ширенє дезинформацийох и знємиренє явносци.
Тоти цо водза кризни менаджмент у „Водоводу”, очиглядно, думали же тераз шицко будзе у шоре и же стратеґия гроженя зоз судом „злей опозициї” будзе достаточна най ше ствар злєгнє и забудзе. Алє, план спаднул до води, кед ше конєчно оглашела и найкомпетентнєйша инстанца – Институт за явне здравє Войводини з информацию же у водоводней системи справди пренайдзени нематоди, алє у малим количестве и же вода безпечна за пице.
Ключне медзитим у тей водовей афери же Институт резултати анализи у хторей податок о нематодох до „Водоводу” доручел седем-осем днї скорей як цо пречурели и до явносци… У тим периодзе одвичательни з „Водоводу” були цихо, а ми навелько пили воду хтора можебуц нє була за пице.
Епилоґ – же у води було нематоди – то знаме. Же дахто одвитовал пре скриванє тей информациї од явносци – то нє знаме. Правда, случела ше змена на чолє Института за явне здравє Войводини, алє аж то тема за себе. Чи вода за пице – одвит ше зводзи на довириє. А як вериц дакому хто криє податки аж и о стварох хтори сущни за сам голи живот як цо то вода за пице. Цо вец ище крию?
У обставинох и атмосфери же ше проблем ришує так же ше го скрива, а хто го виглаши по автоматизме преглашени за зраднїка, мержителя лєбо дацо горше, з тим случайом и емпирийно доказане же довирия у нашим дружтве нєт. Прешол тидзень-два як з найвисшого места сообщене же новосадска вода добра за пице, а купчей води у маркетох и далєй нєт, односно попреда ше такой як сцигнє на полїчки. Гражданство ше векшински ище нє одшмелює пиц воду з чопа. Тельо о довирию. З другима словами, можебуц и гласам за це, алє ци нє верим. Єст дацо поразнєйше?
Становиска висловени у тим тексту виключно авторово и нє вше одражую ушорйовацку политику новинох „Руске слово”.