ДЮРДЬОВ – У парохиялним доме Церкви Рождества Пресвятей Богородици всоботу, 13. децембра отримана креативна роботня за дзеци висших класох основней школи на котрей з рециклажного материялу вирабяли винчованки, а на тему шветох котри пред нами.
Дзеци на роботнї привитала предсидателька церковного одбору дюрдьовскей грекокатолїцкей церкви Любица Отич, котра з тей нагоди, як дипломована историчарка башедовала о историї винчованкох, як випатрали дакеди, а як випатраю тераз, о їх историйним розвою, та и о символики сличкох котри найчастейше на нїх.
На двогодзиновей роботнї дзеци активно вирабяли винчованки зоз рижного рециклажного материялу: картону, салветкох, новинох, хасновали и рижне платно и други прикраски.
Роботня часц порєкта „GREEN ACTS” у реализациї Каритасу Епархиї св. Миколая чиї координатор, Елемир Джуджар. Вон тиж привитал дзеци и гварел же ше планує и концом януара шлїдуюцого року, после шветох орґанизовац симулацийни активносци у сотруднїцтве зоз валалским Добродзечним огньогасним дружтвом, як и ище два роботнї и еколоґийни камп за дзеци котри, би бул реализовани концом школского року, у юнию або юлию.
Креативну роботню за дзеци орґанизовал Каритас Епархиї св. Миколая у сотруднїцтве зоз дюрдьовску парохию, волонтерами и Церковним одбором дюрдьовскей грекокатолїцкей церкви.
