РУСКИ КЕРЕСТУР – У Велькей сали Дома култури Руски Керестур, всоботу, 5. септембра отримана проєкция филма за дзеци „Майнкрафт”, синхронизовани на сербски язик.
Гоч Велька сала нє була скроз полна, на проєкцию ше одволало красне число дзецох, насампредз нїзших класох основней школи, хтори пришли зоз своїма родичами, бабами и дїдами, або зоз товаришами.
Филм за дзеци „Майнкрафт” то авантуристична фантазия хтора заснована на популарним видео-бависку ориґинално наволаним „Minecraft”. Приповедка провадзи ґрупу юнакох хтори ше нєсподзивано найду у нєобичним коцкастим швеце, дзе ше муша удружиц, прежиц числени опасносци и пренайсц способ же би ше врацели дому. Филм виполнєни зоз гумором, акцию и познатима елементами зоз видео-бависка.
Проєкцию орґанизовали Општина Кула и Месна заєднїца Руски Керестур, а уход бул безплатни.