Читателє котри паметаю длужей, алє и пасионовани любителє фодбалу, знаю о анґлийских навиячох котрих анґлийска Влада у чаше конзервативней Марґарет Тачер мушела змесциц до Закону, же би ше зопарло насилство на трибинох фодбалских змаганьох, алє и ширцом по Европи. Гулиґанство постало модел справованя фодбалских навиячох, тих навиячох котри ше тримали за найвирнєйших фодбалских фанох ширцом по Европи. Такому шведкове и ми у Сербиї, алє навияцки ґрупи котри держава хаснує як паравоєни формациї за обраховйованє зоз нєистодумнїками, тераз прескочим.
Углавним, насилство на фодбалских трибинох и на улїчкох после закончених фодбалских змаганьох, даскельо децениї було состойна часц фодбалу, як и самих мундиялох. Но, децению назадок, гулиґанство навичох цалком превершели орґанизаторе шветового першенства, як домашнї, так и орґанизаторе зоз ФИФИ.
Правда, перши крочай направени на першенстве у Арґентини, тераз уж давного 1978. року, кед упрекосц здравому розуму и елементарней людскосци, шветове першенство орґанизоване у Арґентини дзе владала воєна хунта под котру забити, мучени и нєстали вецей як 30 000 людзе з котрих векшина нїґда нє пренайдзена, понеже их хунта руцала зоз авионох до моря. Исную и шведоченя же диктатор Хорхе Видела грожел бавячом Перуа так же вошол до їх зоблєкальнї зоз наоружанима вояками. Так теди Арґентина зоз подозриву побиду 6:0 вошла до полуфинала, а потим и освоєла мундиял. Так же за нас зоз кельо-тельо здравим розумом и елементарну людскосцу, Арґентина ма лєм два трофеї зоз шветових першенствох, а нє три.
Случай першенства у Бразилу. Нїяких навиячох, та аж анї фиґуративно анґлийских, нє мож поровнац зоз тедишню власцу правици котра виведла 150000 воякох и полицайох, як и коло 20000 людзох зоз приватного обезпеченя, же би чували стадиони од своїх жительох. Демонстрациї Бразилцох, тих найхудобнєйших, почали два роки пред тим, понеже им власци пре мундиял валяли закрица над главами и охабели их на улїчкох. Бруталносц зраженьох ескалировала под час першенства, за котре „руцени” 11 милиярди долари, а на гражданох руцали слизови ґаз, штреляли ґумово кульки и попер спрей.
Першенство у Катару 2024. року ище вше швиже, алє як и у случаю у Арґентини, и тото ФИФА орґанизовала за огромни пенєжи, анї кус ше нє стресаюци коло положеня роботнїкох котре здабало на рабство. И то у шицких блїзковосточних квазимонархийох, та и у Катару. Най нє бешедуєм о других людских правох.
И док тото пишем, хиби ище 53 годзини до тогорочного финалу, маме одбитих судийох, нєприлаплїве справованє ґу иранскей репрезентациї, маме Трампову интервенцию, понїщени ґол Єгипта звонка розума, нєдолаплїви цени уходнїцох, и нєнормалне звекшанє цени транспорту у городох дзе ше у ЗАД бави змаганя. И, Арґентину у финалу, и то на таки способ як кед би арґентинска хунта була на власци у ЗАД, алє Арґентина найлєпши Трампов союзнїк на цалим америцким континенту.
За сам верх ФИФИ нєт вецей места. Алє насилство у институцийох, нє на фодбалских трибинох.
Становиска висловени у тим тексту виключно авторово и нє вше одражую ушорйовацку политику новинох „Руске слово”.