Пишем вам тоти шорики, ище зо мнє морска соль нє зишла. Були зме на морю, путуєме дому и роздумуєме волац кумових. Кед бизме сцигли пополадню дому, нашвидко ше розпаковали, могли би и присц. Зажадали зме ше их. Лєм, дацо би и порихтац, даяку госцину нашвидко, уж кед нам госци до обисца приходза.
Роздумуєм цо знам так „нашвидко”: торту „лєнїва жена” (на тот завод нє будзем превельо писац о проблематичносци назви торти, и цо вона шицко инсинуує), а за слану закуску може „царска пита”. Треба ми и попораїц, сладке сиґурно нє сцигнєм направиц. „Царска пита” ше швидко прави – то сцигнєм.
Замишим муку, вайца, олєй, солї, йоґурт – то на погарики идзе, нашекам и умишам сира, квашени огурки, паприґи, шункарици… А нє, заш лєм будзе паризер, вон тераз тунї. Уж кед нам го замкли так на туньо, чкода нє похасновац.
Думки ми одблукали до оводи, кед зме го за фриштик доставали. Намасцени фалат хлєба з марґарином (наценко), два колєчка паризеру, чаї и ниа, фриштик! Анї теди сом нє барз любела паризер, та анї кед тот фриштик бул на шоре.
Понеже уж нє мам бог зна яке думанє о паризеру, роздумуєм чи нє будзе ганьба послужиц го, кед нам кумово приходза. Заш лєм вони блїзка родзина.
А кому же го послужиц? Дзецом? Нє идзе, им треба давац квалитетни намирнїци, заш лєм рошню. Можебуц кед як госци приходзи дахто хто поволани лєм зоз пристойносци, а нє муши так часто приходзиц? Та, таких анї нє волам до обисца.
А можебуц, лєм можебуц би державнїки могли мерковац на того нашого економского тиґра, мерковац же би инфлация нє поєдла нашо плаци и остарац ше за достоїнствени живот як таки, а нє „змиловац” нам ше зоз знїжованьом ценох?
Направели себе систему у хторей медиї велїчаю їх кажди рух, а змучени людзе ше цеша у каждим олєгчаню живота хторе им ше „да”. Нє роздумуюци о вецей пасмох хтори наисце уплївую на квалитет наших животох як наприклад: як ше троша нашо динари, яки плаци маю державнїки, на яки способи ше троша, обрацаю и „райбу” (нашо) динари, же бизме на концу сцигли по тото же нам наисце значи же цени кафи, паризеру и ище даєдних животних намирнїцох и артиклох знїжени.