КУЛА – У орґанизациї Културно-уметнїцкого дружтва „Др Гавриїл Костельник” стреду 18. януара, у просторийох дакедишнього Шаховского клубу з пригодну програму означене националне швето Руснацох.
Шицких присутних зоз красним и пригодним словом привитала Амалия Ковач. На початку, одслухана державна гимна „Боже правде” и шветочна шпиванка Руснацох „Браца Русини”, а потим вецей о Руснацох пречитала Цецилия Мудри.
Програма була составена зоз трох часцох: на початку бул виведзени виривок зоз монодрами „Милионерка”, котру написала Ирина Гарди Ковачевич а одбавела ю Амалия Ковач, потим мишана шпивацка ґрупа одшпивала два коляди и на концу Янко Лендєр виведол виривок зоз монодрами „Илия опозиция”, котру написал Дюра Папгаргаї.
Програму провадзели и члени Националного совиту Руснацох, предсидатель Йоаким Рац и Желько Ковач.
После законченей програми шицки вєдно предлужели друженє и розгварку.
