ЧОКА – Госцованє у Чоки за Искру було єдно од госцованьох на котре коцурски фодбалских клуб пошол одбавиц добре стретнуце и нє страциц.
У першим полчаше публика нє мала нагоди видзиц ґол, алє було борбено и у таким бависку ше Искрово бавяче лєпше знашли и витворели два стопостотни шанси. Малацко потрафел стативу, а Комазец после єдней красней акциї вибил сам опрез ґоламана, медзитим його бице закончело понад ґола.
У другим полчаше обидва екипи почали бавиц дакус отворенше и рушели на побиду. Чока заш лєм лєпше отворела други полчас и на початку була лєпша. Таке бависко им принєсло резултат у 60. минути кед дали ґол.
После приятого ґола Искрово фодбалере рушели зоз шицку моцу дац ґол и знова превжали бависко. Найлєпши шанси мали Сердар и Роґанович, алє им ше нє удало. Кед уж шицки на трибинох подумали ше Искра прецерпи перше пораженє, у 92. минути Човс зоз половки копнул єдну длугоку лабду котру на найлєпши можлїви способ дочекал Данило Янкович и дал ґол.
По конєц Искра могла и цалком обрациц резултат, алє єй бавяче нє вихасновали ище єдну шансу котру мали.
За Искру бавели: Ступар, Секулич, Роґанович (Михняк), Сердар, Малацко (Човс), Комазец (Колошняи), Мачиженски, Янкович, Бодонї, Милованович (Суботич), Неделькович (Нешкович)
После шейсцох одбавених колох Искра єдина нєпоражена екипа у лиґи. По тераз штири раз победзела и два раз одбавела нєришено. После 6. колa є на другим месце на таблїчки зоз єдним бодом менєй як цо ма Србобран котри по тераз на пейц змаганьох зазначел побиду и єдно стретнуце страцел. Праве у шлїдуюцим колє Србобран будзе госцовац у Коцуре та нас очекує дерби медзи двома першопласованима екипами.